美國加息，香港銀行冇跟隨加息，投資者以為可以鬆一口氣之際，任總走出嚟話要研究如何令港息跟貼美息，以防熱錢一旦流走，香港需要大幅加息，同時避免通脹過急。任總此語一出，本來在14100高位徘徊的港股，午後要倒跌27點，收報14033，逼近14000關口。任總影響力與格老似乎有得揮，其實金管局要收緊市場銀根扯高拆息非難事，問題只在於力度控制是否恰好而已。
一波持有滙控（005）6.01%，但消息對滙控股價冇特別刺激作用，收報126.50元，冇起跌，成交15.6億元。黑客話，一波未必係自己揸晒咁多滙控，估計大部份是代客持貨，其實可能只係反映一波有好多客睇好滙控。英國大選有結果，工黨勝出拖累英鎊下跌，滙控可能因而受壓，抵銷一波大量持股的好消息。
恒指成份股就快又要作季度檢討，市場再傳網通（906）會入選，而新世界（017）及信置（083）可能重返藍籌之列。不過網通踢高至10.80元後就無以為繼，午後跌0.93%至10.65元收市，新世界及信置亦各跌0.59%及0.65%。反而傳會出局的聯想（992）再升3%至2.60元。
深圳中航（161）披露獲長實（001）增持至5.43%，另外又傳會出售從事手表業務的亞達股權52.24%套現。不過股價仍缺乏支持，收報1.25元，跌3.8%，成交只得34萬元，反映此股欠缺炒家捧場及散戶跟進，空有利好消息亦無助股價表現。
阿虎