繼韓國成為全球首個享有正式PSP上網服務之後，收到消息香港某大ISP亦同SONY密斟上網大計，而且重好快會有合作公布。至於下星期推出嘅行貨PSP，坊間仍有不少地方可以落Order預訂，不過訂之前最好問清楚死點光點方面嘅保養。
文：打機鐵人
XBOX買Game有嘢送
XBOX近排密密送禮，除咗前幾日逼爆奧海城嘅《FORZA》活動之外，新出嘅《SPLINTERCELL3》重會加送原裝攻略，而《FORZA》除咗送八達通套之外，更有限量T-shirt送，買之前不妨問問舖頭先。
而月中就上畫嘅《星戰前傳III》，各大遊戲生產商當然唔會放過同電影相關產品嘅商機，今次全部主機都會推出遊戲版，唔會大細超，但係香港只有XBOX有行貨推出，定價$299。
特別色NDS行貨月中登場
今個星期NDS養狗熱依然持續，顏色主機隨住日圓上漲，加上日本假期，升到上$1,150都重有價有市。而行貨顏色主機就會喺月中上市，不過今個月只有黑色同白色，定價$1,280，粉紅同粉藍就要等到6月先有行貨。大熱嘅《任天狗》行貨價就約$290。