各界歡送老董嘅大小宴會已經去到尾聲，噚日終於輪到老董最怕去嘅立法會，由一班現任同前任議員為佢送別，范太做東，好多稀客如李國寶、李啟明以至成日叫佢落台嘅劉慧卿同陳偉業都現身宴會廳。
老董一早到咗，但A1董太就唔見人，不過佢人雖然唔到，班議員都好關心佢。立會前內會主席兼醫管局前主席梁智鴻更大讚董太對慈善機構同醫護界從冇「托手踭」，一心一意為社會服務，佢重形容董太出席好似天上嘅星星，會增輝不少。
至於其他議員就用唔同方式歡送老董，其中前內會副主席葉國謙致辭不忘幽民主派一默，話董生退休，有啲議員會覺得好失落，因為佢哋即刻冇咗箭靶；而現任內會主席劉健儀就笑老董，話今日唔會有人問佢膚淺問題。至於羅致光同周梁淑怡，就用歌聲歡送阿董，周太重選《甜蜜蜜》呢首歌，叫老董甜蜜蜜咁想住立法會。
老董就好輕鬆，佢話以前去立法會，要全副武裝，今日就唔使，重話就算同議員有爭拗，大家都係朋友。健康方面，佢就話醫生叫佢要再減十磅，又叫佢唔好打太極住，因為對佢隻腳唔好。至於立法會議員，佢話發夢都會見到佢哋，不過就講明唔係發噩夢時見到。
董太唔嚟，大家都有啲失落，不過，八方聽聞佢同老董遲吓會返美國洛杉磯小住，希望A1會心情好轉啦。
另外，有選委「爆料」，公開講一定會選特首同埋一定夠票嘅金勞詹諗住「爆陰毒」，問晒八百名選委支唔支持佢，若果邊個唔表態，佢就喺報紙賣廣告，登晒佢哋個大名。有選委好勞氣咁話，一定會以牙還牙，勁賣廣告同佢鍊過！
傳真︰2623-9278
電郵︰[email protected]