畢仔情心落定
安琪蓮娜親親難民珍妮花咬爛手指

安琪蓮娜祖莉（AngelinaJolie）同新片《史密夫決戰史密妻》拍檔畢彼特（BradPitt）嘅緋聞近期傳個不停，連倫敦杜莎夫人蠟像館都將佢兩個蠟像放埋一齊，不過一向我行我素、熱心幫人嘅安琪蓮娜呢幾日就去咗巴基斯坦進行四日親善訪問，前日佢就去到位於白沙瓦嘅難民營，探望入面嘅阿富汗難民。

倫敦買屋避畢仔
身為聯合國難民公署親善大使嘅安琪蓮娜，前日扮到好似當地婦女咁，入到難民營之後就細心聆聽啲難民同小朋友有乜嘢需要，佢希望能夠為三百萬名難民籌款，改善佢哋生活。
另一方面，有傳珍妮花雅麗絲頓（JenniferAniston）因為不堪同畢仔分開嘅打擊，由以往一日吸一、兩支煙，變到𠵱家煙不離手，而且重成日咬手指，不時顯露喺痛苦中掙扎嘅神態。有知情人士又話珍妮花為咗逃避畢仔嘅陰影，計劃喺倫敦高級住宅區肯辛頓買屋住。

至索媽咪排第二
而網站Screensavers.com舉辦嘅至正名人媽咪選舉，安琪蓮娜同彭美拉安德遜（PamelaAnderson）並列第二位，僅僅輸畀正懷有第二胎嘅德國名模HeidiKlum，將為人母嘅BritneySpears同意大利女星莫妮卡貝露絲（MonicaBellucci）分列第四、五位。