呢日碰到律師Ｓ與地產經紀Ｗ一齊食飯，經紀Ｗ講話好大聲，十分風騷，律師Ｓ得個聽字，狀甚謙虛。呢兩位仁兄其實係中學同學，兩人談話絕無機心，亦無禁忌，點解律師Ｓ與地產經紀Ｗ坐埋，竟然咁低調呢？
飯後一齊搭地鐵返中環，左丁山問律師Ｓ：「乜你竟然會讓經紀Ｗ講晒嘅。」律師Ｓ低頭一諗，答話：「大概係職業病，經歷八年半建華之亂，我律師樓啲做契生意大跌，買賣一個單位，我收費不過幾千，𠵱家樓市叫做復甦，生意多咗好多，但收費仍然冇乜大起色，冇議價能力，經紀Ｗ啲行家就唔同，董建華整佢哋唔死，𠵱家生晒，一個經紀佣，收到笑，所以啲地產經紀見到我，有啲老闆款㗎，我點敢得罪佢哋，久而久之，見到老同學Ｗ，亦都讓佢三分。」
律師Ｓ個世姪讀緊建築學，知道好難搵到工，預備將來唔考建築師牌咯，考地產經紀代理牌容易好多，讀書少好多，搵錢容易得多。律師Ｓ啲行家係某中環會所中堅分子，每個星期在會所吃午飯，隔籬有一枱醫生、一枱代理公司高層，律師醫生碰頭，一餐飯幾百蚊找數，歷久不變。代理就唔同，餐餐蒸條大東星，餐餐兩三千銀找數，整整吓，代理要分開坐在房間內，又開間房，律師就被逼讓位。會所當然希望收入多啲啦，理得你啲律師坐慣張枱。
律師Ｓ話特區政府經過地產大跌市之後，見過鬼怕黑，一於全力托市，唔增加土地供應，適逢炒家大炒人民幣，香港銀行水浸，利息易跌難升，豪宅價格最合炒，地產經紀自然家肥屋潤。律師Ｓ話：「一個投資者炒豪宅，畀咗經紀一百萬佣金，經紀笑呵呵，竟然幫投資者問我：呢單做契，你要收幾多千？我為之撞晒火，叫佢哋過主。」