繼「非洲舅父」後，益力多不妨考慮邀請「細B」做代言人！鸚鵡細B是憑着一句「益力～多！」而在網上點擊爆燈，你的電郵信箱應該不止一次，收到不同朋友轉寄來有關牠的短片。牠的聲線被評為像女人，也有人懷疑牠的動聽聲音是假的，記者親身聽過細B開金口後，終於揭開短片背後的謎底！
記者：邵超
攝影：楊錦文
熱播網址：www.hkbirdstreet.com點擊入「新鸚鵡電影院」
Take1《Simon的細B：係啤酒定益力多》
細B開聲有得解
細B：「五嫂，買餸啊！」
幕後解畫：原來細B見五嫂着緊鞋。
細B：「華哥食飯。」
幕後解畫：大家開枱準備開飯。
細B：「嘟嘟嘟」扮㩒掣聲
幕後解畫：華嫂拎衫準備開洗衣機。
灰鸚係咁醒
細B的主人華哥訓練出一隻咁有性格的鸚鵡，但就謙稱「好多灰鸚都做到」。當然，非洲灰鸚鵡好聰明是人所共知，但都要看後天栽培，如果無人陪佢傾偈，即使有語言天份也枉然。
探訪細B的目的，就是要八一八華哥訓練的竅門。「灰鸚普遍一歲就識講嘢，開頭佢自己會學啲日常聽到的聲音，愈高頻愈易學，譬如電話聲、開閘聲、女仔聲同細路仔聲等等。之後學『早晨』、『Hello』、『拜拜』，歲半時要開始引導佢對話，譬如問吓『你叫乜名呀？』、『今日凍唔凍呀？』」在網上短片中，細B曾提及的「五嫂」，就是華哥的媽媽，她正是培訓細B的幕後功臣！因為平時她跟細B相處的時間最多，所以練就了細B的「女人腔」。
創新鸚語「恭喜返工」
在華哥心目中，細B就如小孩子。未剪翼時，唔鍾意同你玩就會飛開，被鬧時更加會擰歪面唔睬你！教講嘢難、拍片更難，不過有華哥就有辦法：「你教佢佢未必肯講，但係鬧佢時順便將要教佢的說話講出嚟，語氣重啲，佢反而會Catch得好啲。佢好鍾意自己組句，譬如『恭喜返工』、『恭喜返嚟』。」
凡此種種得意的句語，想拍下嗎？細B面對陌生的鏡頭，必定唔出聲（估計是自我保護意識）。所以華哥次次要幫攝錄機「蒙頭」才可以完成拍攝工作，我們亦因此有幸見識細B的「真鸚發聲」。
被寵壞的小孩
若你想受到細B的重視，唔該你手上準備食物。「以前佢未剪翼時，佢會偷餸㗎！食物兜剩番三分之一時，會猛咁嘈提你換；幫佢換時，佢都會講句『唔該』。佢見到我哋掰橙，佢會講『好味道』叫我哋畀佢食，但又要人𠱁『好味橙要唔要？』佢先至伸左爪扮勉為其難咁食。佢未食過嘅嘢，要我哋食先至肯食，驚死有人毒死佢咁！」又為食又怕死，咁似人嘅！
細B最怕鴨
不過，華哥口中最叻同人嗌交的細B，其實都有弱點，就係：「佢好驚公仔，我成日嚇佢『鴨仔嚟啦！』過年時八、九歲的姪女扮格格，佢即刻好驚。」呢啲就叫惡人自有惡人磨。
華哥再提提大家，他說千萬不要在養鸚鵡初期由朝陪到晚，但其後就激減相陪時間，因為咁樣會害牠們心理不平衡，自殘咬毛。而且玩也要有規律，華哥就每天早晚各花個多小時陪細B玩，連放假都係咁。
點樣揀灰鸚鵡？
主人華哥指，鸚鵡乘坐飛機來港時，航空條例只允許吃生果，或許會因缺水而產生後遺症，但通常較難察覺。此外，尚未戒奶的BB鸚鵡夭折率較高，要盡量避免購買。細B在三個月大時帶返家，患上上呼吸道感染，流鼻水，幸好睇醫生醫番好。購買時一般可做的檢查是看腳趾、翼是否齊全，眼睛有沒有神，有沒有流鼻水，若鼻側的毛較深色，可能曾流鼻水弄濕。
Profile
姓名：細B
性別：雄性
品種：非洲灰鸚鵡
性格：寸、為食、唔舒服時會「啪啪」聲
喜愛的食物：橙、蘋果、益力多
嗜好：睇防盜眼
