闊別香港樂壇多年的劉美君最近返港為音樂會任表演嘉賓，但她今次只會逗留三、四個星期，因為在美國有一個她十分掛念的人，就是只有一歲多的女兒。
當年憑一曲《午夜情》唱紅八十年代的劉美君，最近返港為「網上行LoveMusic05巡迴演」任表演嘉賓。劉美君由於聲帶出現問題，九四年決定不再與唱片公司續約，並移居美國，其實當時內心掙扎很大，她說：「我嗰陣把聲沙晒，醫生話我聲帶有個繭，不過好多人都唔會做手術，所以嗰時我需要一段好長時間去休息。」
劉美君指兩個兒女亦是促使她離開香港的主因，她說：「嗰時足足唱咗七年，我兩個仔女成日都要跟住我出去做嘢，簡直好似喺娛樂圈長大，我當然唔想佢哋咁啦，加上我又唔想小朋友喺香港接受教育，於是決定唔再續約，之後就去咗美國生活啦，𠵱家聲帶個繭當然好番晒啦。」
據劉美君透露，大仔已經有二十歲，目前讀大學三年級，而她於○二年再婚，並於去年一月誕下小女兒，所以劉美君留港這幾個星期十分掛念只一歲多的小寶貝，她說：「今次我返香港都係因為一個好朋友邀請我做騷，我真係好掛住我三個小朋友。」
劉美君於美國空閒時會上網和玩瑜伽，她說：「我冇嘢做咪走去讀書囉，讀設計、webdesign，我覺得人一定要不斷增值自己，而且我學呢啲嘢亦成為我同小朋友溝通嘅橋樑之一，起碼佢哋講上網時，我呢個媽咪都知佢哋講緊乜呀，而且佢哋見媽咪咁大個都努力讀書，佢哋都唔敢懶啦。」
問到劉美君會否覺得現時樂壇已經沒有「星」？她說：「唔同嘅歌手代表唔同嘅年代，我覺得容祖兒唱歌唱得幾好呀，佢已經代表咗○五嘅一個star，其實我聽香港歌手嘅碟都係聽番自己個年代嘅人，好似張學友呀、林憶蓮咁。」劉美君又笑言間中有朋友打電話談娛圈花邊新聞，她笑說：「多數都係講啲藝人負面新聞，我好少聽到有人話邊個隻碟大賣。」
採訪：李珮洳
攝影：葉君海
服裝提供：SportMax
場地提供：蓮園粥麵小廚
