跟住連戰之後，輪到親民黨頭目宋楚瑜執二攤訪問共區！一到西安，宋楚瑜即時失控狂爆共方溫家寶式文藝溫情肉麻假大空獨白，又話感激，又話感動；又話三通之外，尚要四通，即是心靈相通；又話甚麼血緣尋根之旅、未來搭橋之旅，總之就瓊瑤三毛再加胡茵夢，講到月朦朧、鳥朦朧，幾乎自己都信埋呢套大龍鳳！
連戰出名儍戇，宋楚瑜出名滑頭！呢條友，為求目的，乜都肯制，尤其最拿手一選舉時就係跪地！佢試過跪地叫人選馬英九，鱷魚眼淚，一㩒掣就長流長有，啲台灣佬話：最驚就係見到宋楚瑜下跪，佢一跪低，個腦就轉緊數，睇吓邊個俾佢呢頭抹完眼淚，嗰頭一個鯉魚打挺，背後就插刀！
宋楚瑜入共區，啱嘞！共方正想同佢計數！當年小蔣暴斃，李登輝啱啱攝位，蔣夫人醒目，話唔畀李登輝做黨主席住，要好似大陸佬觀察煲呔咁，一步步嚟！點知宋楚瑜發動宮廷政變，同李登輝擦鞋兼抬轎，大義凜然咁挺登、撐輝、保李，李登輝就咁權力獨大！
所以秋後算帳，冇宋楚瑜，就冇李登輝，跟住亦冇台獨！當宋某走入中南海，胡錦濤應該喝令手下兩旁，將宋楚瑜生擒，綁拿送問協助支持李登輝「分裂祖國」之罪！
不過，阿壽爺佢又點有咁吉屎？睇怕連佢都俾宋楚瑜迷惑埋，念多兩句新詩，宋胡兩人抱頭痛哭，即時焚香結拜兄弟，跟住重封宋楚瑜做中共軍委主席，由宋楚瑜出任「討李打扁統一義勇軍」司令，換上軍裝，帶三萬解放軍攻打台灣，點知佢就帶隊兵砸番壽爺轉頭，亦唔出奇！面對鬧劇，都係台灣總統陳水扁今次反應得體！陳總話：無論邊個去巡視共區，可以表達意見，但冇人可以出賣台灣二千三百萬人利益！
以宋楚瑜陰不陰陽不陽嘅千年道行，今次同陳總李公登輝、連戰等人，合唱三簧，互扯貓尾，都唔係冇可能！你睇佢一到西安就變身做戲子、呢隻江太祖式嘅功架就知！不過呢嗱，呢啲就叫做政客嘞，小小特區，就係冇咁嘅人才！
台灣有民主、有自由，邊有咁易俾人賣落火坑！連宋只不過係迫緊共方同陳總正式官方接觸，喺美國暗中主持大局之下，陳總訪中，喺不久將來，一定會發生，保持現狀，不統不獨，久唔久又嗌吓台獨，台灣查實穩如泰山，睇見林D9喺機場笑騎騎嘅樣就知喇！
傳真︰2623-9278
電郵︰[email protected]