莫文蔚近日開始為下月舉行的兩場紅館演唱會作準備，日前她到健身中心秘密練兵，主攻操弗長腿及臀部線條的運動，務求開騷時勁晒四十二吋長腿，及以最佳狀態表演飛天舞。
莫文蔚在下月十日及十一日舉行一連兩場的紅館個唱，由於她已有四年未有在港開騷，故對今次演出十分認真，她更兼任創作總監，希望個唱耳目一新。
雖然距離開騷尚有一段時間，但莫文蔚已開始秘密練兵，日前她在銅鑼灣一健身中心喼弗，在教練指導下做收緊腿部及臀部線條、加強心肺功能和燃燒脂肪的器械運動。
莫文蔚積極備戰一點不敢怠慢，因她在個唱中會大騷四十二吋長腿，而且會展示絕活舞功，她說：「今次演唱會有太多唔同元素，大家見嘅唔會係平常睇嘅舞蹈，會係fusion、crossover，有中國舞、現代舞，甚至韻律泳嘅意念。」
莫文蔚除邀得古巨基、劉德華和陳奕迅擔任嘉賓及獲珠寶商贊助千萬鑽飾外，名牌SalvatoreFerragamo更會提供無數絲巾，讓她製造漫天絲巾飄舞的場面，莫文蔚又會表演飛天舞，她說：「我會吊威吔跳舞，我好鍾意吊威吔㗎，好奇怪，可能我輕，所以唔辛苦。」
至於會否作超性感演出？莫文蔚說：「我覺得性感唔係大不了嘅一回事，但唔會用咁多錢做個騷去sell性感，唔係為一件事去暴露、引起話題，重點都係音樂出發。我唔會着一條成個台咁大嘅裙、唔會整個好大嘅髮型，係用個人而唔係用件衫去壓台，但都有啲好貼身、閃令令嘅衫，放心，可以有腳睇嘅。」
莫文蔚為保持最佳狀態，獲父親炮製養聲靚湯滋潤，她笑說：「爹哋煲嘅湯水可以養聲，佢煲乜我飲乜，佢會煲石斛水，對肺同聲都好，而我喺開騷前幾日就盡量唔出聲，少講嘢會好啲。」今次莫文蔚擔任創作總監，未知她有否向執導演筒的男友馮德倫討教意見？她笑說：「冇乜特別，亦都冇諗搵第二啲人幫手。」
採訪：朱倬誼 攝影：陳慧安
場地：PhillipWian（CausewayBay）
