大角嘴維港灣十座低層D，九百二十八呎，因有無敵全海景，加上有五十萬靚裝修，戶主又認識影藝界朋友，所以經常被電視台借嚟拍MV，人氣藝人陳慧琳Kelly同許志安Andy，都喺度拍過MV。
利記封重勳話，以五百六十萬成交，呎價約六千，屬市價，四年賺一百五十三萬。
買家係外區換樓客，鍾情全海景單位，兩日內睇咗十個單位，最後決定買呢個。
封重勳話，買家睇完樓，先知單位有好多藝人借用過。唔知買家日後係咪都肯借出單位，畀藝人拍MV呢？
地產代理行內，中記都算係特別嘅機構，老闆施永青除咗敢言，重好熱心參與慈善公益活動，不時身體力行，唔係捐咗錢就算嗰隻。
上個禮拜，老施同執董張奕威、張炳強等參加苗圃行動「助學長征」，四日都行足全程。佢話，捐助苗圃已有十年，覺得呢個機構「均真」，行政同助學費用帳目分明，重係義工比例高，行政費係向熟人募捐。
施老闆希望透過親身行動同呼籲，擴大影響力，等多啲人支持，同時令內地人明白，內地嘅力量都好重要。
Q嘜標誌深入人心，等同品質保證，美記噚日獲香港Q嘜優質服務計劃認證，頒發Q嘜證書，同時攞到ISO9001：2000品質管理系統證書。時代轉變，好多行業對公司形象都好着緊，希望可以攞到唔同形式嘅獎項或認證，令公司喺做生意方面可以有較大優勢。
美記今次攞到Q嘜，股東可能更關心，係咪可以推動股價上升。
尖沙嘴凱旋門開賣之後，市場開始留意對面海另一度「門」，大坑名門。
兩盤開波前，都話要做出破紀錄嘅價錢，凱旋門天際獨立屋，賣三萬一千幾蚊呎，名門都有近八千方呎嘅複式，準備挑戰呢個價，平面圖亦喺市場曝光。
名門巨無霸複式，六房設計，上層有空中花園，從平面圖睇，屋主可以建空中水療按摩泳池，喺間房行出去就可以跳落水，十足十外國嘅度假酒店，而且物業位置咁高，點玩都唔怕被偷窺。
地產代理監管局除咗監察代理有冇違規犯例，另一項工作係提高行業水準同服務質素。
地監局今個月起，推行「持續專業進修計劃」，頭兩年會係自願形式，地監局期間會檢討，睇吓日後變為強制時，會採用嘅模式同時間表。計劃嘅目的，係提升從業員專業水平，加強保障消費者，提高公眾對呢行嘅信心。
呢個計劃分核心同非核心科目兩部份，假如一年內攞到十個學分（六個核心同四個非核心科目），就可以獲發「持續專業進修計劃達標證書」。
另外，美記林鳳芳呼籲當局，增加認可課程同機構，等從業員可以多啲進修渠道。美記擬聯同EVI教育亞洲，拓展地產代理網上教育。香港置業楊彩鳳話，會積極籌辦多元化課程。
電郵地址：[email protected]
