俄國油王阿巴莫域治喺全世界養住幾間「二奶球會」，大家都知大婆車路士喺英超聯有幾威喇！但係巴甲聯嘅哥連泰斯認真唔生性，卡數碌咗唔少，聯賽一開鑼就「脫腳」，兩戰一和一負，禮拜三重喺巴西盃俾費古倫斯以互射十二碼淘汰出局（輸二比三）。
上個禮拜泰維斯同隊友打大架嘅新聞重上封面，今個禮拜就輪到教練巴薩里拉向龍門法比奧哥斯達「開刀」上頭條，令對方成為今屆巴甲第一個飯碗不保嘅球員，並且話佢嘅「質地」唔啱隊波咁話，重人身攻擊話佢「超重」。個龍門反駁話「唔妥我就出聲，使乜搵個咁嘅藉口呀！」
副會長山齊斯都撐龍門，話巴薩里拉唔好將阿根廷嗰套搬過嚟，應該畀啲耐性。但我求大俠就認為，巴薩里拉咁做擺明搵法比奧哥斯達祭旗，將隊波表現差嘅責任推去佢身上。巴薩里拉冇摩連奴咁識玩手段，博取球員嘅支持。睇個勢，哥連泰斯一係炒教練，唔係隊波真係有排衰，各位捧場客要認真小心。
馬甸尼搏命抵讚
前晚AC米蘭躉肯定一路睇波一路標冷汗，隊波出線夠險唔在講，而開波無耐睇住馬甸尼為咗解圍硬食尹尼古一腳，負傷捱完半場至退下火線，真係痛在佢身，傷在球迷心！身為隊長嘅佢奮不顧身，做晒榜樣確係抵讚。賽後冇話佢唔踢禮拜對祖記場王者之戰，AC躉可放心。
德軍奇帥軍令如山
體育用品公司「三間」包晒德國隊全身裝備包括波砵，故佢哋教練奇連士文話明如有「三間」以外贊助嘅球員，好似列文及高路斯咁，唔肯着「三間」波砵踢國家隊比賽，唔使旨意可以入選。德軍不嬲講紀律，就連出名寸嘅名宿馬圖斯以前都要屈服，所以我求大俠都認同佢哋咁做。
巴塞爭標用人兩難
周日西甲聯巴塞隆拿前鋒伊圖雖為球隊打開紀錄，但之後都要被換走，難怪佢發脾氣，冇跟大隊去賽後記招自己走人先！佢事後講番當時覺得自己可以再入多球，重諗定點慶祝梅開二度；難為巴塞教練列卡特，伊圖呢次違反軍紀，之後幾場爭標聯賽，用佢定唔用佢好呢？
利斯差啲驚世全裸
利物浦周二晚成功「截車」闖入歐冠盃決賽，賽後利斯喺球場上興奮到剝晒衫褲，差啲就赤裸人前。事後佢話當時係開心到唔知自己做緊乜，只係想將所有嘢都奉獻畀球迷，回報大家嘅支持，如果唔係重有少少清醒，真係底褲都會除埋出嚟掟埋上觀眾席，到時就全球……