七十四歲嘅法國名導尚盧高達（Jean-LucGodard）以及同佢齊名嘅杜魯福（FrancoisTruffaut），係法國新浪潮電影嘅兩大主將，雖然有人認為高達嘅電影曲高和寡，但仍然有唔少電影發燒友對佢推崇備至，佢嘅經典作品包括《斷了氣》同《輕蔑》等。而高達出名挑剔，批評電影人嗰陣一向都不留情面，尤其係荷李活嘅電影，而荷李活大導演史提芬史匹堡（StevenSpielberg）就俾佢狂踩。
高達批評史匹堡拍戲唔係好掂，而且又無知，尤其佢執導嘅奧斯卡最佳電影《舒特拉的名單》，就更加扭曲史實，佢話：「我唔認識史匹堡，但係佢嘅電影就唔多掂。好似《舒特拉的名單》咁，佢根本唔清楚屠殺猶太人呢件事，只係求其喺其他地方搵靈感嚟拍。」其實高達批評史匹堡已經唔係第一次，佢○一年嘅舊作《愛之頌》就係搵史匹堡嚟開刀，藉此批評荷李活電影同冇文化嘅美國。
此外，史匹堡同湯告魯斯（TomCruise）合作嘅夏季大片《強戰世界》，將會搞搞新意思，片中出現嘅神秘外星人會喺日本巨蛋棒球場今個月內舉行緊嘅幾場棒球賽中出現，到時日本NTV電視台直播賽事嗰陣，會用電腦特技令場內出現《強》片嘅外星人出現嘅場面，重會有主持人坐直升機扮晒驚咁講現場嘅情況。