輕舟已過萬重山，恒指升破萬四，期指低水43點。計埋恒指成份股除息因素，期指實際係高水超過70點。期指高水，傳統智慧係代表個市向好。不過傳統智慧好多時係錯多過唔錯，正如先一排，期指大低水，下集原來唔係個市要跌，而係上升。所以，𠵱家入市賭C輪，注碼咪太狼。
長實C輪3560：長實（001）見過74.25之後，收73.75元，升1格。走勢向前移動3步，然後向後移1-2步，緩步上，可以玩得耐啲，C輪諗得過。
長實C輪正路之選係3560，6月中到期，輪價19.9仙，溢價0.3%，槓桿率37.1倍（有效20.8倍），引伸波幅17.9%。冇錯，隻輪時日無多，但交投夠旺，而且冇人搵支槍指住你要賭到夠鐘之日。賭3幾日，正股升1-2元，揸隻輪就已經得米。
和黃C輪3808：和黃（013）收70.50元，升1格。和黃C輪3808收35仙，升1.5仙。和黃旗下公司，到咁上下就有收購、分拆等搞作，做咁多嘢，無非都係為咗產生啲特殊盈利，好嘢嚟㗎。3808喺7月中到期，溢價零，槓桿率20.1倍（有效14.6倍），引伸波幅15.3%。隻輪擺吓擺吓，吼住擺落少少之時，上車。
章盛