星爺講過人人都係食神，無論阿媽阿爸阿哥阿妹只要用心去煮都係食神，即使簡單的家常菜都可以令人一生難忘。訪問了幾位藝人，他們都不約而同對親人煮的菜餚印象最深刻，一碟醉雞令皮膚不再對酒精敏感，一碗愛心湯水可以有覺好瞓，一碟鮮茄豬扒改變與家人關係，一碗粥令你甜在心頭，一件蛋角可以勾起開心片段，你心目中的食神又令你有何難忘回憶？
記者：陳冰麗
攝影：周旭文
陳鍵鋒燉湯改善體質
不要以為螢幕前做學警的陳鍵鋒（Samuel）身體強壯，其實他小時體質弱，氣管易敏感，有氣喘，跑三步就要回一回氣，每晚更因咳嗽不能安睡。川貝燉鷓鴣湯是治療好Samuel敏感氣管的良方。「全靠呢個湯水，我至唔使晚晚咳，因湯有啲苦澀味，起初唔鍾意飲，但在媽咪強迫下，惟有就範！」Samuel表示，當初如果沒有她的堅持，現在就唔會有覺好瞓。
川貝燉鷓鴣
用咩料：川貝3克、鷓鴣1隻、南北杏少許、薑1片
好易做
1.鷓鴣清乾淨內臟，洗凈待用。川貝、南北杏洗淨，備用。
2.將川貝、鷓鴣、南北杏、薑片一同放進燉盅內燉約3-4小時，加適量食鹽調味即可。
丘凱敏豬扒見真情
丘凱敏的嫲嫲有好多個孫，而她一直覺得嫲嫲好Cool，不過一碟豬扒改變了她對嫲嫲的感覺。「嗰次嫲嫲煮咗一碟我最鍾意嘅鮮茄豬扒畀我食，重係多糖多汁多番茄，嗰次嫲嫲首次淨係煮畀我食，當時我至知原來平時好Cool的嫲嫲，都有留意我每逢有呢味餸，飯都會食多一碗，足以證明佢都好關心我嘅。」
鮮茄豬扒
用咩料：
豬扒3件
番茄1個
蒜茸2茶匙
醃料：
鹽及糖各1/2茶匙、生抽2茶匙、生粉1茶匙、胡椒粉少許、水及油各1/2湯匙
芡汁：水3/4杯、茄汁2湯匙、生抽1茶匙、鹽1/2茶匙、糖1湯匙、生粉1茶匙
好易做
1.豬扒洗淨抹乾，用刀背拍鬆，拌入醃料醃約10分鐘。番茄切角。
2.燒熱適量油，放入豬扒煎熟，取出切成粗條。
3.另燒熱適量油，爆炒蒜茸及番茄，加芡汁煮滾。豬扒回鍋與汁料拌勻即成。
朱慧敏睹粥思人
一碗平常到極點的粥，卻令朱慧敏睹粥思人。「記得十歲時，因腸胃不適，無胃口食嘢，婆婆就送上一碗雞粥畀我食，當時瞓喺床上即時感到好安慰。」可惜，朱慧敏十六歲那年，婆婆因病過身，以後每次食粥都會想起婆婆。
竹絲雞瘦肉燕窩粥
用咩料
竹絲雞1/2隻
瘦肉6両
鮑魚片2-3片
即食燕窩少許
煲粥米適量
葱花少許
好易做
1.竹絲雞洗淨，斬件，出水備用。鮑魚片解凍，出水備用。瘦肉洗淨，出水。
2.煲粥米浸洗淨，加適量水煲煮至滾，加入竹絲雞、瘦肉一同煮至米腍爛。
3.加入鮑魚片煲至滾起，加適量鹽調味，盛起，加入即食燕窩，撒上葱花。
元華同師傅做蛋角好開心
蛋角是印證元華與師傅的一段開心回憶。「每逢過年，師傅就會做元寶蛋角畀我哋食，有時我哋會幫手做，好開心。十五歲嗰年，我答應幫師傅剁豬肉，點知手起刀落，唔小心斬到自己左手食指，幾乎見骨，當時我唔知驚，師傅反而被我嚇親，以後做蛋角都拒絕我幫手。」雖然斬到手指，但元華卻表示未驚過，如果師傅在世，仍渴望可再度與他包蛋角。
元寶蛋角
用咩料
蛋4隻
豬肉4両
好易做
1.雞蛋拂勻，加入少許鹽及生粉，然後放入鑊中以慢火煎至熟。
2.將煎好的雞蛋皮平放於桌面上，然後用小碗壓出一個個圓形的蛋皮。
3.豬肉剁碎，加鹽及胡椒粉調味，釀入蛋皮內，用少許蛋汁塗於蛋角邊緣，包成元寶形，放入鑊內蒸熟即成。
康子妮醉雞克服皮膚敏感
自小對酒精過敏的康子妮，因食過媽咪炮製的醉雞後，令她不再對酒精敏感。「媽咪鍾意下廚，中三嗰年放學返屋企，媽咪做咗一碟醉雞畀我試，當時都唔記得自己對酒精敏感，二話不說即刻攞件食，食咗三、四件後，至開始有啲驚。好彩，嗰晚我無手腳痕。」就因為那次的失魂，令康子妮有意外收穫，從此對酒精不再敏感。
醉雞
用咩料
雞1隻、粗鹽適量、葱薑適量
調味料：
清水2杯半、糖1茶匙、紹酒11/2杯
好易做
1.雞洗淨，抹乾水份，以粗鹽搽勻雞身及肚內，葱薑鋪在上面，醃約4小時。
2.雞先蒸15分鐘，然後反轉再蒸10分鐘至熟，攤凍斬為4件。
3.蒸雞汁連同調味料煮滾，把雞浸入（足以浸過雞肉的份量）至汁冷，放入雪櫃再浸約一至二天就可食用。
