元華早前連奪兩個「最佳男配角」獎，日前其妻特別返港與他撐枱腳慶祝。二人結婚近二十五年，但撐枱腳期間你餵我雪糕、我餵你食龍蝦，煙韌如新婚夫婦。華哥更豎起拇指大讚老婆說：「超晒分，勁過大長今。」
元華月前憑《功夫》一片連中兩元，在金紫荊及金像獎中均奪得「最佳男配角」獎，由於兩個頒獎禮舉行期間，華嫂都要留在加拿大照顧考試的女兒，未能返港與丈夫分享喜悅，故近日華嫂特別返港與華哥撐枱腳補數。
適逢後天便是母親節，而華哥與華嫂撐枱腳的餐廳附近有不少花店，他便順道代一對兒女購買鮮花送給華嫂，盡顯這位硬漢子溫柔體貼的一面。問華哥對華嫂這位好妻子好母親有何評價？他即豎起拇指大讚說：「超晒分，勁過大長今。」
今年九月便結婚二十五周年的華哥華嫂，撐枱腳期間更表現甜蜜，不是華哥餵華嫂食龍蝦，便是華嫂餵華哥食雪糕，恩愛之情羨煞旁人。
不過，問到華哥是否因長時間與移居加國的太太分開，故與愛妻見面時特別有小別勝新婚之感？華哥否認說：「雖然我哋一個喺香港，一個喺加拿大，但我哋日日都透過電腦webcam見面傾偈。不過電腦呢家嘢，我哋兩公婆完全唔識，係對仔女幫我哋喺香港同加拿大屋企部電腦度裝好咗，然後教我哋點㩒掣㗎咋。」
華哥近日連奪兩獎身價上升，問華嫂可擔心會有其他異性向華哥獻媚時，華嫂笑說：「佢又唔係靚仔，個樣又咁惡，邊有女仔敢接近吖。反而我唔喺佢身邊煮飯畀佢食，佢成日食街外嘢，食到膽固醇過高。」華哥聽後即表示愛妻近年返港次數較密，他亦在華嫂再三叮囑下注意飲食，所以健康狀況已有改善。
採訪、攝影：戴彩煥
