四十歲嘅草蜢成員蔡一智，前年年尾被踢爆同圈外女友周雪芳拍拖，馮仁昭知道佢哋感情發展穩定，唔單止用「870」做情侶車牌號碼，而且重喺大坑築愛巢共賦同居，但最耐人尋味嘅，反而係蔡一智同佢女友成日帶住一個小妹妹出出入入，好似一家人咁。
嗰位小妹妹嘅雙眼勁似蔡一智，髮型亦同佢一樣，都係留咗把長鬈髮。上個月二十九號朝早十一點，蔡一智同女友帶埋位小妹妹，齊齊去咗大坑嘅大牌檔食早餐，小朋友坐喺佢兩個中間，周雪芳全程負責照顧小妹妹，成個好媽咪咁，蔡一智亦同佢哋有講有笑。
翌日夜晚七點幾，蔡一智又同女友同埋小妹妹離開大坑寓所，揸車去咗歐陽震華喺筲箕灣開設嘅飯店「越華會」，會合成班親友食晚飯，當時佢哋三個又係坐埋一齊，周雪芳驚小妹妹整污糟把長髮，即時為佢束起條馬尾，坐喺女友身邊嘅蔡一智見狀重咪咪笑，成副有女萬事足嘅樣。
其實有好多蔡一智嘅朋友都曾經見過呢位小妹妹，有人亦懷疑蔡一智可能已經做咗爹哋，不過噚日佢就否認已婚同誕女傳聞，話個細路女係佢家姐個女喎，咁外甥女同舅父就梗係似樣啦！
薛凱琪噚日接受商台節目電話訪問，陳錦鴻都係節目嘅座上客，薛凱琪被問到同吳卓羲、陳鍵鋒傳不和嘅事，佢話：「撇除吳卓羲同陳鍵鋒，我識到一班好朋友。」陳錦鴻即追問薛凱琪：「點解要撇除吳卓羲同陳鍵鋒？」俾陳錦鴻咁窒法，薛凱琪咪惟有收口囉！
亞視為紀念鄧麗君逝世十周年，聽日會播出節目《傾情懷念鄧麗君》，主持珈潁噚日喺記者會度介紹鄧麗君喺九三年擔任亞姐表演嘉賓時着過嘅粉紅色旗袍，佢重話節目中會全球首播鄧麗君未播出過嘅國語歌《無奈》。
珈潁早排重專登去咗台灣三日，搜集咗好多有關鄧麗君生前嘅軼事㖭。
吳佩慈最近出碟《LookAtMe》，佢因為俾林志玲前男友追求，搞到成日俾人攞嚟同林志玲比較，馮仁昭覺得咁重好，因為佢可以順勢宣傳新碟，佢首同名新歌《LookAtMe》已經成為台灣最大下載網站Kuro下載排行榜第三位，吳佩慈話：「這證明我不只有外在，還有內在。」
許鞍華同黃淑儀噚日喺尖沙嘴為《獅子山下》拍攝宣傳短片。許鞍華即將開拍新戲，佢自爆作品被批評，佢話：「我媽咪啲朋友話我嘅戲退步咗，話大不如前。我𠵱家睇番以前嘅戲都有啲慚愧，可能最初拍嘅戲，感情會好啲，但係𠵱家嘅拍攝技巧就比以前成熟。」
無綫噚日更新《大長今》結局嘅威水收視數字，平均收視四十七點，約三百零八萬觀眾收睇，最高收視五十點，約三百二十九萬觀眾收睇，比佢早幾日公布嘅四十九點重多咗一點，重高過皇馬訪港嘅紀錄，因為皇馬最高收視雖然都係五十點，但觀眾只有三百二十七萬五千人。另外本來有人提議即時喺明珠台重播《大》劇嘅足本，但無高層開會之後，已經暫時擱置呢個建議。
