賓架陳從事銀行業逾三十年，呢日睇《蘋果》頭版，竟然有怪異新聞，就係有髮型師涉嫌開辦銀行PacificAsianBank，又有娛樂界老叔父涉被騙二百萬元。咁都得？賓架陳大嘆：「自以為多年目睹銀行界怪現象，有乜嘢我未見過，服咯服咯，你快啲通知賓架Ｃ，等佢將呢件事擺落佢本書度。」
賓架Ｃ曾出書——二十年目睹金融怪現象——後生賓架應該必讀，但好似PacificAsianBank咁嘅奇案，確係值得賓架Ｃ記上一筆。
呢單「假銀行」騙案夠晒騎呢，南韓KEB（韓國外換銀行）KoreaExchangeBank單嘢就夠晒占士邦。《金融時報》（五月四日）報道，美國投資公司LoneStar於○三年十月以十二億美元購入百分之五十一股權，搵咗資深賓架RobertFallon做行政總裁，今年Fallon改任主席，由一位RichardWacker做總裁，新人上任，梗係要裝修過總裁辦公室啦，臨搬入去之前，美國人原來興搵電子專家檢查過，尋找總裁辦公室內有冇隱形異狀。點知檢查之下，搵到安裝在牆上，間諜慣用嘅極微型攝影機、揚聲器。負責監察裝修之行政人員即時被炒。南韓竟然發生如此事件，你話啲韓國人係唔係「大長今」咁忠誠呢？香港剛啱又爆出一單廉記竊聽，違反《基本法》之事（睇五月四日英文《虎報》頭版報道廣興國際一案，為之一驚。），似乎大公司啲CEO、主席都可以效法美國佬，搵專家到辦公室掃一掃蟲（bugs）。
上述之RobertFallon，曾在香港花旗銀行服務多年，阿松司長嘅舊上司，一手引薦阿松由花旗轉工去大通嘅，應該亦曾係馬局長嘅舊老闆。