數牛王，除咗頻頻有新搞作的Levi's又或者日本Evisu外，重有好多牌子，出街唔想下下同人撞褲，要有自己Style，又有質素保證，好多牛迷都會選擇日本牌子，今日主角招牌款式以日圓為標記，名叫YenJeans，成立剛滿十周年，聲名遠至日本及歐洲，最新搞作重踩埋過界，再同Vans合作出鞋，Sneaker以全白夏日感覺設計，摒棄一切牛仔褲的感覺。其高明之處，是由擁有眾多Fans的Vans入手，加上不再玩牛仔布，時裝味更濃！
記者：胡卓琳 攝影：周旭文
YenJeans靠碧咸上位
YenJeans係日本MichikoKoshino旗下品牌，於95年由設計師榎並崇統創立，分別有男、女裝及Vintage系列，牛仔褲以外亦有Tee及外衣等，其牛仔褲以高質的天然藍染技術而廣受歡迎，於日本及歐洲等地都甚有名氣，最深入民心當然要數兩年前碧咸力Sell嗰條DavidJeans，亦曾推出卡通人物高達Gundam的限定版牛王。YenJeans於日本歐洲等多個城市均有分銷地點，另分別於大阪、韓國及倫敦設有品牌專門店。
男女裝秋冬率先預覽
夏季都未完，但YenJeans的秋冬季時裝就經已準備就緒，除了耍家的牛仔產品以外，重有長袖Tee，大褸等等預備登場，各位拭目以待。
代理咗YenJeans接近兩年的Take5老闆Benny話：「其實YenJeans喺日本已經紅咗好多年，因為佢嘅設計Fashion味較重，而且牛仔褲嘅洗水效果好靚，加上自從搵咗碧咸做代言人之後，喺日本名聲更加勁，就算𠵱家喺香港都已經有一班固定的YenJeans擁躉。」
第二彈SellFashion
比起第一次合作，今次同樣係揀咗Vans的TopSeller鞋款Sk-8Hi，不過就放棄咗藍染牛仔布，改用了夏季較為受落及Fashion味十足的白色，加上暗花及鞋頭擺到明W-name之作的「YEN」字款，令時裝感覺更濃。$1,280
同場加映！OneHundredxVans
同YenJeans份屬同門，大部份貨品都出產只有一百件的另一日牌OneHundred，無獨有偶今季首次揀中Vans合作，鞋款都係Sk-8Hi，另有SlipOn鞋款，設計簡單易襯。
今季玩甩鬚
貨品見於日本及歐洲等地的YenJeans，絕招在於天然藍染的洗水技術，Detail位絕不馬虎，今季以甩鬚為主打，一系列牛仔褲都加有不修邊幅的車線位，大玩不經意的隨意感覺。
褲袋上色有堅持
YenJeans後褲袋位置同Levi's、Evisu一樣有一個招牌的SignatureLogo，而香港代理就獲日本YenJeans方面授權，可替客人的牛仔褲褲袋虛線的日圓Yen字，髹上分別螢光粉紅或者黃色的油。不過照日本方面的指示，客人只可於同一條牛仔褲兩邊同時髹上同一隻顏色的油，即係唔可以鴛鴦色或者髹一邊唔髹一邊！
今年改招牌
已落實的計劃，日本版的所有YenJeans，褲頭Label將由本身白底紅圈的Label改為黑底紅圈，另外歐洲版的YenJeans就會採用白底橙圈，要知道自己着住嗰條係乜版，一睇就知。
售賣點：
Take5（25755526）
銅鑼灣波斯富街57號一樓
