昨日最矚目的股票，唔使多講都係被和記電訊（2332）私有化的和記環電（757），後者噚日復牌，勁升41％，收0.67元，竟高過私有化作價0.65元，確實係怪事。
小初唔想評論呢個計劃正唔正，淨係記得舊年好多朋友諗住捧超人場，於0.90元認購好多配售新股，結果新股未到手，已經蝕到眼光光。呢件事好多股民都有切膚之痛，亦知道超人確係好叻。
除和記環電外，近年來一直熱炒的富豪國際（078），噚日晏晝3時過後突然急跌，亦受注目，尤其係沽盤來自外資大行，好多人均議論紛紛話唔知咩事？經紀陳話，佢收到風沽盤好似同一些場外交易活動有關，但究竟係期權到期抑或係其他交易就尚未清楚。
富豪昨日一度被質至0.63元，收0.65元，跌9.72％，成交股數2.07億股，金額1.395億元。雖然0.6元水平好似頂得住，但經紀陳話提防人地未沽晒，千萬唔好亂咁博反彈。
慕容小初