東隧禍港，瘋狂加價大宰割，第一日因七成貨櫃車司機，好多在東莞深圳沖涼揼骨未夠喉，未及趕回開工，所以交通未見災難！
隨住貨櫃車司機叉足電，惡果逐步浮現！特區政府一味只識叫市民唔好「掉以輕心」，即是提早一兩個鐘返工返學，亦即是叫香港人逆來順受，接受中資財團、東隧幕後大老闆中信泰富嘅瘋狂勒索！
中共前總書記趙紫陽講過：現時嘅大陸，係「社會主義」最劣質嘅一面，同「資本主義」最貪最衰嘅一面相結合，因為大陸佬學人玩「資本主義」，知啲唔知啲，以為就係一味搜刮，無情剝削，個個仙Lam到盡咁解！
若然美國嘅資本主義係咁，一早就爆發咗人民革命！中資財團唔識乜嘢叫「資本主義」，以為一咪刮、刮、刮，加上漢人學得胡兒語，執多句「尊重合約精神」嘅鬼佬口水尾，就係「維持香港資本主義制度五十年不變」，殊不知正在撩撥緊民憤，今年七一大遊行，若然打正「堅決反對東隧瘋狂加價」，打底五十萬人，不在話下！
面對東隧以「合約精神」、「合法利潤」呢啲咁嘅殖民地時代英式名詞，摧毀特區經濟，自稱「行政主導」嘅董曾過渡政府，只見個廖冬冬喊咁口，叫市民咪「掉以輕心」之外，乜用都冇！
𠵱家係「行政主導」，定係「合約精神」大晒嘅「司法主導」？若然係司法主導，特區政府好快啲出聲，以便中電、港燈、煤氣、九鐵、地鐵，齊齊攞盡合理利潤，一齊宣布合法加價！淨係准東隧合法利潤，唔准其他中電港燈呀咁賺到夠，咪即是大細超？搵阿水嚟投資？
呢鑊嘢，八方近日亦聽到有啲愛國土共同胞破口大罵前港英政府埋地雷靠害！佢哋話，最衰都係彭定康，明知中資企業貪得無厭，臨撤走，重將啲過海隧道畀晒中資，若然佢出售畀太古、怡和、滙豐，識得乜嘢叫中庸、含蓄、平衡，咁咪唔會加價囉？
諗落又唔係冇道理！不過，係乜嘢促使到肥彭咁蠱惑，臨走安排一場鬼打鬼嘅鬧劇呢？咪又係因為鄧小平話收回香港囉？數上去，咪即是鄧小平自己拿屎上身？
第一日減少一萬幾架車，年尾計數，離「合理利潤」更加遙遠，咪又大條道理再嗌加價？
傳真︰2623-9278
電郵︰[email protected]