近日在報紙電視台不斷見到一個廣告，就係新法書院嘅推廣兼招生廣告，其中一個招徠賣點就係「中文大學合作夥伴」，乜嘢叫做「合作夥伴」呢？好多人都唔知，呢晚食飯，其中有中大畢業生話：「新法賣廣告，有以中文大學為面上貼金之嫌，新法究竟有冇得到中大同意㗎，中大咁多合作夥伴，容乜易俾人搵晒着數？」
哈，唔講猶自可，一講就烽煙四起，原來在座諸君之中，有五位係新法書院校友，惡佬明就係其中一位。社工Ｃ問惡佬明：「當年你點解會揀新法讀書㗎？」惡佬明大大聲講：「入唔到DBS（男拔萃）吖嘛？」眾人大笑，問人點解要揀新法書院，等於問人冇飯食，點解唔食文華酒店白朱古力蛋糕！
我哋成枱人都係中學會考成績唔叻得去邊之人（左丁山間私立中學已經執咗），想當年，新法係苦海明燈，救生咗馬時亨等今日名人。惡佬明話：「新法係資本主義市場產品，你有錢交學費，佢就會收留你，我哋如果唔係得到新法收留讀書，邊度會入到大專讀工程呀，嗰陣時新法嘅中六、中七專收華仁、拔萃、喇沙唔收嘅學生，請好多港大畢業老師教預科，都谷得幾緊要㗎，入大學比率唔算失禮㖭。」佢一講完，左丁山就記得賓架Ｌ係香港華仁會考生，華仁唔收佢讀中六，佢去咗新法，一樣考到入港大，見番啲華仁同學。
好多私立英中，已經執晒，估唔到新法重係繼續生存，而且有錢賣廣告㖭，呢間學校，幾十年來為中學生提供一個「讀書有taketwo」嘅機會，好多人多謝佢，多謝之人包括新法學生及新法老師，左丁山有幾位大學同學就係靠在新法兼課做老師，得到大學學費及生活費嘅！惡佬明呢晚講講吓，有啲飲水思源，重懷念起王澤森校長㖭。