一向「衰多口」嘅車仔領隊摩連奴，前晚帶隊作客輸畀利物浦，冇得做「三冠王」，不過摩連奴賽後一反常態，「冇發爛渣」不特止，重行入球場同利記球員握手道賀，總算輸波贏風度嘞。
摩連奴嘅劣行真係多籮籮，聯賽盃決賽就因為挑釁利記球迷，俾警方勸喻未完場就離場，歐冠盃十六強就因為話巴塞教頭列卡特同球證有偈傾，俾歐洲足協罰禁賽；不過前晚場歐冠盃四強大戰嘅長笛一鳴，呢位火爆教頭就一反常態，好有風度咁行入球場，逐個利記球員握手道賀，又安慰自己班兵，行來行去成十分鐘，陰謀論嚟睇，唔知係唔係想討好利記fans，收購謝拉特都容易啲。
講開又講，摩連奴已經連續兩場冇着佢個件幸運名牌大褸，上場作客保頓預咗捧盃開香檳慶祝，驚整濕件靚嘢都無可厚非，今場冇着球隊就輸波，睇嚟下場主場對查爾頓，摩連奴都要摷番件大褸出嚟着。
前日《法國足球》公布最高收入球員，收入同勞力最不成正比都算係排第四位、年賺一億二千萬港元嘅韋利。呢位國際米蘭前鋒今季後備多過正選，最離譜日前話自己就算出場三十分鐘都見倦，近一兩年有關佢嘅新聞不外乎拈花惹草。唔通踢波易倦，喪蒲就唔會倦？
皇馬最近傳出對阿仙奴嘅西班牙前鋒雷耶斯，及曼聯嘅葡萄牙前鋒基斯坦奴有興趣，重準備用費高做交易籌碼；前者更已經作出正式斟介。據報費高本人係想去曼聯多啲，如果呢單轉會交易最終成事，曼聯變相搵個「新費高」換個「老費高」返嚟，就真係笨咗啲嘞。
無良僱主無處不在，近日爆出拉素今季冇畀過尼古路同甸奴巴治奧一個仙。原來拉素會長盧迪圖覺得兩人冇用，要求佢哋減薪遭拒，於是唔畀兩人成日上陣兼唔畀人工；最近兩人求助球員工會事件先曝光。我求大俠覺得拉素好過份，話晒冇功都有勞，希望佢哋可以攞番啲錢喇！
繼火箭中鋒姚明話為教練雲根迪，繳付十萬美元（約七十八萬港元）罰款嘅一半之後，噚日又有一名家具舖老闆，話佩服雲根迪嘅勇氣，願意為佢畀晒罰款。呢位仁兄重講明，如果NBA唔批准，就請雲根迪到佢間舖頭逛逛，重畀十萬蚊佢做亮相費。估唔到雲根迪原來有咁多擁躉。
逢周一至周五見報