許志安自從將經理人合約簽咗畀M8後，事業發展一路未好過，佢份約後來由同佢傳過緋聞嘅Jenny主理，但依然未見起色。安仔上年已經試過𢱑黃柏高食回頭草，但對方並冇反應，聽講安仔近排又有新目標，就係林建岳嘅東亞娛樂。
安仔前女友鄭秀文（Sammi）將會加盟東亞，Sammi嘅經理人郭啟華一早入埋東亞擺位，郭啟華都曾經做過安仔經理人，兩個嘅關係保持得好好，於是安仔搵郭啟華幫佢搭路入東亞，可能佢諗住如果傾得成，咁佢同Sammi同一間公司，都好有噱頭，於是膽粗粗獅子開大口，叫價二千萬簽三年。
以安仔今時今日嘅環境，電影又冇市場，唱片市道又咁差，東亞肯畀二千萬佢就真係嫌錢腥，東亞內部幾乎所有人都反對，卒之梗係傾唔成啦，睇嚟安仔都係冇緣同Sammi拍檔搵食嘞。而安仔同正東唱片嘅約喺七月定八月就滿，約滿前會出埋張國語碟，之後就拜拜，唔知佢到時嘅發展會點樣呢？
劉德華噚日接受商台訪問，講到佢最近為咗投資高清電影而調高自己片酬，佢之前又講過唔會再做老闆，華仔話：「我話唔同人合作做老闆啫，我今次係自己做，不過片酬由八百萬去到一千萬，有啲老闆都會嫌我貴。」佢又宣傳自己嘅新歌《我得你》，意思即係我愛你，佢話如果遇到個真愛可以連錢都唔要，不過就會繼續工作。
周汶錡（Kathy）噚日喺天后宣傳港台嘅新劇，佢喺劇中飾演一個秘書，被老闆嘅太太懷疑佢係第三者，Kathy表示自己喺現實度一定唔會做第三者，如果佢發現男朋友有第二個嘅話，重好有可能會選擇離開，因為佢自小就培養咗禮讓嘅習慣，唔鍾意同人爭嘢喎。
蕭薔前日喺台灣中正國際機場，同桃園縣長朱立倫一齊做「飛安大使」，民航局唔止頒咗一張「飛安大使」嘅證書畀蕭薔，重做咗六十塊人形紙牌放喺機場降落地點，以後旅客喺台灣離境，都可以睇到呢塊宣傳牌，蕭薔用國語話：「我祝福每位乘客快快樂樂的出國，平平安安的回家。」
近期掀起韓劇熱潮，識講韓文兼且對韓國有深認識嘅宋芝齡當然特別吃香，佢喺五月中就會幫新城電台DJ陳小芝主持嘅《聯fan所》節目內嘅新環節擔大旗教韓語。宋芝齡之前同池珍熙做訪問，佢話見到池珍熙着低V衫，兼露出結實胸肌，真係迷倒唔少女仔喎。
李國祥噚日喺商台接受訪問，佢已經好耐無出嚟，今次佢嚟係為咗宣傳佢遲啲出嘅新碟，佢呢隻碟係全部翻唱人哋嘅歌，重要差唔多全部都係女仔歌，佢話：「啲朋友話我唱女仔歌，特別有感情，所以咪試吓囉，咁耐冇出碟一啲壓力都冇喎，賣唔賣得唔係我控制到㗎嘛。」
