昨日八方寫肥龍許仕仁辭任九巴董事，但唔知幾時辭埋馬會董事一職，專心去競選；有好事之徒來電，問邊個會繼任？唉，你估八方乜都知咩；不過，任志剛（圖）當年被迫退位讓賢，現在阿董落咗台，阿松更加唔知去咗邊，許老爺既然另有高就，會唔會讓番個位畀老任呢？
講開馬會，四月二十一號八方寫過「本地練馬協會」同馬會紮馬，但又陣前勒馬嘅風波。話說協會準備開記者會，爆馬會刻薄嘅內幕，點知在見記者前一粒鐘，忽然縮沙，搞到班記者食白果。
原來，馬會在協會爆料前讓步，應承同佢哋會面，咁協會當然拖住先，此亦情有可原。但馬會點解肯讓步呢？傳聞係夏佳理主席介入，責成黃至剛總裁處理，於是黃總裁搵手下同協會主席黃汝安傾，重黑字白紙畀咗信過黃汝安，暫時擺平咗件事。
傳真︰2623-9278
電郵︰[email protected]