港股噚日再度上衝萬四大關，恒指最高13981，收13945，升51點，成交活躍，有144億元；期指強勢，升81點，收13845，低水100點，扣除大藍籌除息之數，期指實際上已高水，市場氣氛轉好。
後市雖看好，但在萬四關前，相信仍須鞏固一段時間，整固愈長，日後嘅升勢會更健康。現時市場看淡者、或未有造淡但冇揸貨者，仍佔多數，佢哋一睇番好，大市升勢就會轉急。早輪講過恒指嘅短期走勢已轉好，家吓中期同長期走勢亦有改善，後市向上，在14200至14300水平整固後，有機會創出今年新高。
威華達（622）已改組，而管理層亦在歐美做緊「路演」，噚日股價又再有異動，大幅飆升8仙，高收0.96元，升破前高位0.95元阻力，且有1770萬股大成交支持，照度上去，短期上升目標指向1.20元。
威華達係電力公司，最近母公司將旗下上市業務重組，將百江燃氣（8132）的58.45%注入，作價17.53億元，由威華達發行新股25.4億股（每股作價0.69元）支付。收購完成後，威華達將成為電力、燃氣及煤氣化的大型能源公司，以噚日收市價計，市值將達48億元。
管理層在歐美推介，聽芬佬講，反應好好，噚日升得咁急，唔排除有基金偷步入市。其實，睇番盤數同埋公司嘅未來發展方向，現水平股價重係好偏低。
先講威華達本身電力嗰瓣，04年度（12月年結）獲利8023萬元，由於發電業務裝機容量擴充，又計劃增加兩台機組，未來幾年，盈利可持續上升。
百江04年度獲利2.64億元，由於不斷收購燃氣項目，保證日後盈利高增長。公司去年收購吉林長春的燃氣項目，已可帶來應佔盈利逾7000萬元。至於目前計劃中的4個煤氣化能源項目，預期07年開始可提供全年貢獻。
重有，威華達正密鑼緊鼓搵緊合作夥伴，進軍本港電力市場，聞說進度幾理想，傾掂之日，股價又會有一番新景象。
05年，估計威華達獲利3.5億元，06年可上升至5億元，每股盈利10.4仙，PE12倍，股價已可見1.25元。
郭兆誠