女人鍾意睇《大長今》，要男友陪埋，一齊眼濕濕。但暗中觀察，原來男人可以咁乸型，感情脆弱到令女人吃驚。追完大結局，用晒男人遞過來的Tempo，抹乾鼻水眼淚，女人覺得男人已經冇陪睇價值，即刻掟煲。
男人呢？鍾意睇波，女友陪坐捧場，由得男人灌啤酒講粗口，忍受着酒吧的二手煙，幾個大賽踢完，男人諗吓，其實除了陪坐，女人根本沒出過聲，顯然不是球癡，男人像是欠了債似的，對女人加倍殷勤，球季一完，不但沒有甩拖，還碌卡透支買名牌禮物送給樣貌一點不似球星女友的身邊人。個女人咁抵得諗，去邊度搵呀？麻甩佬再粗魯，都忍唔住晒冷，向其他波友大讚女友有品。男女分手的態度這樣不同，男人其實更似大長今性格。女人功利，小心眼算死草，話咁易就放棄，就算未換畫，都是騎牛搵馬，野心很大。晚晚追睇《大長今》又點，寄望她能對號入座轉性的男人，應該死心。
長今落幕，近三百萬男女觀眾頓時失落，像開飯後，發現枱面雖然有三餸一湯，可惜就是沒有高麗泡菜，對廣東菜口淡淡，引不動食慾。韓劇忽然搶手，來來去去，女人哭過不少類似的橋段，掟過幾次用眼淚做湯底的煲之後，再用電視劇來做就分手的原因，實在過於「人大釋法」，連自己那關也過不到。所以女人不再追劇，改為煲碟，用的是「內炎火」，揀中的男人，要經得起高溫考驗。市面充斥着的都是國產隨時爆炸的壓力煲，哪裏去找這種猛男呢？自我感覺冇長今咁好命的𤷪𤺧女子，大大話話過百萬，長今後遺症冇得醫，你就算避得開東隧，也避不了這批辣菜。