「亞瑟王」李國章噚日去參觀深水埗嘅聖公會基愛小學，同啲小朋友玩遊戲、講古仔、又畀啲校園小記者獨家專訪，鬼咁春風得意，但佢不忘「寸寸貢」，繼續藉機向「死敵」張文光發炮。
當佢同啲學生真情對話時，學生問佢平時工作同最辛苦嘅事係乜，佢竟然話：「平時工作係同立法會議員嗌交……俾人鬧時就覺得好唔開心。」李局長喺班小朋友面前講到自己咁慘，莫非想博同情？
當佢接受小記者訪問時，班小記者好有禮貌，問題十分恭敬，冇刁鑽問題，李國章梗係樂意答。點知佢又藉機寸在場二十多位大記者，叫大家學吓班小朋友喎。
李國章噚日重自爆咗一宗鮮為人知嘅事，佢話自己後生時想保持大隻啲，於是本身係富家大公子嘅佢，竟然走去做地盤散工，重係佢第一份賺錢嘅工。學生賣口乖讚佢𠵱家好fit，但呢位「過氣地盤工人」話𠵱家人老骨硬，連運動都做少咗。佢係人老，但把口一啲都唔老呢！
傳真︰2623-9278
電郵︰[email protected]