甲級商廈買賣氣氛熾熱，一啲都唔比豪宅遜色，好似尖沙嘴新港中心，有單位大半年內四度轉手，一共升值五成四。
屋之島李思博話，二座十二樓○六室，一千九百四十八呎，○○年十二月，由中資買家以每呎三千三百三十六購入，到舊年十月，以四千四百三十蚊一呎，轉售畀另一家中資，跟住話咁快喺同年十二月賣畀英資公司，呎價五千四。
單位今年一月底完成交易，二月再次易手，呎價升到六千三百六十六，買入嘅係本地炒家，成交期為今年九月。呢個炒家持貨個零月，就搵到另一個投資者，以呎價六千八接貨，升值六點八巴仙，摸出賺近八十五萬。
東涌好少有獨立屋供應，香港興業水藍天四十一座洋房，自然搶手！好快重出現二手成交㖭。美記李子樂話，八十一號屋，以逾二千五百萬摸出，十日賺近三百九十萬，係首宗二手。
間屋逾二千三呎，投資者以逾二千一百萬、每呎近九千三購入，由外區用家以呎價萬一承接，成為第一間賣出嘅洋房。
李子樂話，買家鍾情水藍天前排洋房，但一手貨要賣到萬二蚊一呎，佢見二手有萬一蚊呎，所以好快就扑槌。
信和旗下十個商場，喺四月三十至五月二號幾日假期，人流量錄得逾一成增幅，當中以屯門黃金海岸商場增幅最勁，達到兩成八，共八萬五千幾人次。
重點商場之一嘅大角嘴奧海城商場一及二期，都增加一成三，有六十萬七千多人次。禮拜日母親節，奧海城商場繼續搞活動，重請嚟藝員助陣。
另外，香港置業就向周日前，首名經該行買入三百萬以上單位嘅買家，送一年健身美容會籍，總值二萬八千八。
做物業管理，有時真係好似做醫生，要將幢樓「起死回生」。置邦物業○三年七月，獲聘為北角海景大廈管業公司，由於幢大廈狀況差，修葺令又未做好，搞到保險公司都唔受保。
置邦接手後，定出一系列維修方案，排埋次序，避免一齊做構成沉重財務負擔；同時，又積極追收業戶欠交管理費，追番四百五十萬。經過一輪工夫，大廈好多地方都變得「靚仔」咗，而保險公司又再次肯為大廈承保。
上個禮拜做內購嘅將軍澳君傲灣，賣樓嘅時候，示範單位都重未搞掂，幾經趕工，今日先完成，開放畀傳媒睇。唔少區內街坊行過樓盤現場，都八啩想睇吓個售樓處。
聽聞，售樓處唔止空間大，重好有夏日氣息，用橙色同綠色等充滿活力嘅顏色做主色，非常貼切樓盤標誌嘅顏色。
好似話，除咗三個示範單位外，售樓處重內有流水淙淙布局，加上樓底高，夠氣派。
聞說，代理聽日集齊準買家資料遞交畀發展商後，星期六或會再派貨發售。
電郵地址：[email protected]
