恒指升51點，國指升16點。本港錢多，唔使驚港息跟隨美息上升。港股短期仍係小康格局，估計國企因為比較落後，有機會跑番快啲。
中企C輪3725：隔晚油價再跌，但油股企定甚至上升，對支撐國企指數好有作用。國指短期睇4800/4850，炒中企指數C輪可以搵啖食。
中企指數C輪，主角係3725，6月尾夠鐘，輪價9.7仙，溢價1.5%，槓桿率18.6倍（有效12.6倍），引伸波幅22%。次熱係3716，亦係下月尾到期，雖然槓桿率大好多，但要畀4.8%溢價，博唔過，除非認為國指會喺非常短時間內急升。
長實C輪3560：長實（001）下周二除息1.42元，本來除息對C輪不利，但除息活動會谷高股價，而有關C輪喺正股除息前溢價已經好低，則C輪亦諗得過。買啲3560博吓，6月中夠鐘，輪價19.1仙，溢價0.6%，槓桿率38.5倍（有效20.7倍），引伸波幅18.3%，不過隻輪時日無多，做嘢要快手快腳。
中移動C輪3599：中移動（941）係少數下跌藍籌之一，升得多回氣好應該，昨日跌0.40元，再跌多啲，低價撈C輪3599，博反彈搵餐晏仔。
章盛