昨日講《炒魷政治》，財務伍其實舉咗一啲例子，中外皆然。
為政者（泛指當權派、總統、首相、總理、CEO、公司主席等等）如果做得太耐，冇「固定任期」（譬如四年一任，連任不過一屆）者，因受權力引誘太大，即使未至腐化如馬可斯，但總會唔捨得放手。財務伍話英國首相貝理雅老早同財相白高敦有默契，連任一屆至半途，就會退位，讓畀白高敦做，但現在貝理雅興致勃勃，想進入歷史，打破保守黨戴卓爾夫人任期紀錄，成為工黨歷史第一人，邊度肯放手呀，佢呢次成功連任之後，如果將最有威脅力嘅白高敦趕走，一啲都唔奇，問題係佢是否有如此把握而已。
當權派藉公司?政府重組之便，炒魷先炒反對派，將啲唔肯擦鞋、唔肯歸邊之人踢走，有個好名詞，就係「我們要有團隊精神，希望每一位內閣人選（或高層管理）都係一個teamplayer，團結穩定十分重要！」正一大石「責」死蟹，被炒之人邊有聲出。
成隊teamplayer之中，邊個會威脅我嘅領導地位呀？AIG之老主席格林伯格（Greenberg）在位三十八年，每隔一段時間就指定一位接班人（包括佢位公子），而每位指定接班人總係會離開AIG，又會咁蹺嘅？格林伯格卒之搞到倉皇辭廟，俾Spitzer嘅調查逼走咗，之搞成咁，九成係集團之內既無反對派，又無威脅者，老先生獨斷獨行，冇人敢出聲提出另類意見之故。
中國過去皇帝屢廢太子，史不絕書；現代中國大魔王毛澤東將共產黨內所有反對派、威脅者如彭德懷、劉少奇、林彪打入十八層地獄，將鄧小平下放三次，更驚心動魄。在公司內做反對派被趕，老早預咗；做事太叻而形成「功高震主」，被認為係威脅者，因而被炒，就死得比較冤枉咯。