中華民國前副總統連戰大陸之行，勝利結束！不過因為被李登輝等人形容為賣台，返回台北之後，肯定會俾人掟一輪臭雞蛋！
台灣係中華文化光復基地，若然咁易賣得甩，咁呢個基地，要唔要都罷！民進黨既然不承認連戰係政府官方代表，佢亦冇同共方簽署任何「和平統一」協議，相反，胡連新聞公報，冇一字提到所謂「統一」，亦冇講過「一國兩制」，相反𠱁到共方承諾「促進結束敵對狀態」，加埋共方送熊貓、贈屍爬，即是話，胡錦濤亦承認，只要唔台獨，乜都得，只求「維持現狀」！
乜嘢係「現狀」？即是話：共方承認中華民國正朝，承認青天白日旗，承認國父孫中山先生正統，換言之，一個文化中國之下，「兩個中國政府」，就係「現狀」，以前共方大罵「不承認兩個中國」，現在就反口承認「未來一個中國」、「文化一個中國」，「夢想一個中國」，之不過，現在就係「兩個中國人政權」，在海峽兩岸隔洋而治！
李登輝十二年總統，向大陸開天索價，提出台獨訴求，現時由連戰落地還錢，換回「中華民國事實存在」嘅共識，咁重唔係勝利，又係乜嘢？唔怪得有啲有識之士，直指連戰同李登輝，係唱緊雙簧，表面扯貓尾，實質上二人維護台灣人安全，手段不同，目的如一！
跟住手，美國就會發功，宋楚瑜之後，胡錦濤邀請陳水扁訪問埋北京，未來五十年，久唔久你訪問吓我，我訪問吓你，只要台灣自己企立得定，就冇可能俾一個不民主嘅中共政府吞併！
中共統戰，台灣難道唔識得反統戰？統戰有乜好驚？正義嘅嗰一方，必定光明正大，得到包括美國在內嘅國際文明社會所支持！胡連新聞公報，冇「統一」，冇「一國兩制適用台灣」，亦冇「不放棄對台動武」，呢一樣就係最新共識，台海冇可能打仗，亦冇得「統一」，維持現狀，香港想窮幾難！
爆料熱線：2929 0000、2786 0099
報料傳真：2623 9278
報料電郵：[email protected]