港股噚日一度逼近14000大關，恒指最高13994，但後勁不繼，午後打回原形，恒指收13893，跌14點；期指表現則較強，收13764，升34點，低水收窄到129點。
大市在14000大關前遇到壓力，相信此水平須作較長時間消化，整固完成後，才能破位而上，衝破14273，創出今年新高。大藍籌中，以中移動（941）最突出，最高27.70元，收27.45元，升0.45元，但港股噚日大部份時間嘅升勢都係靠中移動來支撐，令人對短期後市有戒心。
實力二三線股而交投又較活的，以中信21世紀（241）嘅表現最硬淨，噚日最高3.30元，其後大部份時間在3.20元以上成交，承接力頗強，收3.225元，升0.10元。中信21股價經大半個月整固後，已連升兩日，不但擺脫10日線（3.075元）同50日線（3.05元），且升破20日線（3.18元），MACD亦將出現入貨訊號，以升破上升三角形的量度升幅計，短線目標指向4.20元。
上禮拜已收到料，話中信21呢個月會開車，且有好大機會見到4字頭，睇呢兩日走勢，可算對辦。中信21家吓市值逾百億元，1年盈利能否去到8億至10億元，係未來股價能否坐四望五的主要關鍵。做得到否？相信並非難事。
中信21旗下的「質檢網」已開始營運，國際同內地具規模的企業亦紛紛加盟，包括微軟中國同貴州茅台酒廠等，計劃到9月份可以簽約4萬家企業，加盟費視乎公司的規模而定，由數萬元至數千萬元不等。
要知道一家國際大企業因冒牌貨而損失的營業額有多少，就不會覺得千萬元的加盟費係天方夜譚，「質檢網」做埋「打假」工作，大企業加盟後，長遠肯定有利。
以未來幾個月簽約4萬家企業，即使以保守的平均2萬元加盟費計，收入已有8億元。至於到明年9月，集團計劃可實現470萬家企業收益更加係天文數字；重有平台的營運，又係另一筆可觀的收入。
中信21可睇勢上車，以3.0元止蝕，目標賺20%至30%。
郭兆誠