近排時有上市公司轉董事，噚日老董嘅家族公司東方海外，都公布咗委任新董事，就係老董嘅三十七歲細仔董立新（圖），由五月一日開始，成為東方海外最年輕嘅執行董事，同身兼主席嘅阿叔董建成共事，初步任期三年。小董原來喺東方海外做咗十三年，之前喺附屬公司東方海外發展（中國）有限公司出任董事總經理，專門做物業投資。
老董自從榮升政協副主席後，雖然講明唔返東方海外，但係𠵱家細仔加入董事局，其實都一樣，套用誠哥講千絲萬縷時嘅說話，即係話冇影響都冇人信。老董嘅長子董立均雖然冇返公司幫手，𠵱家係港龍航空嘅業務總裁，都算係同行，話唔埋日後有機會回巢一家親呢。
爆料熱線：2929 0000、2786 0099
報料傳真：2623 9278
報料電郵：[email protected]