講賽車遊戲，各位都會第一時間想起PS2嘅《GT4》，而XBOX遊戲中，就以《PGR2》最受XBOX玩家歡迎。最近《PGR2》製作班底就再度出擊推出《FORZA》，今次更係擺到明挑戰《GT4》一哥地位，加入多款車廠超過230架真實跑車，畫面比《PGR2》更上一層樓！日前香港XBOX就搞咗個發布會，學足《GT4》推出時一樣，有齊靚車、靚女等至搶元素，難怪吸引到一大班機迷排隊搶購試玩。
記者：許福合 攝影：陳偉強
遊戲類型：賽車
對應機種：XBOX
遊玩人數：1至8人
網絡連線：支援Live!
行貨售價：$299
開發商：MicrosoftGameStudios
(c)2004MicrosoftCorporation.AllRightsReserved.
《FORZA》作為本年度XBOX大作，自然吸引到唔少玩家期待，而XBOX亦花咗唔少心思宣傳，前日就喺奧海城搞咗個發布兼試玩會，未正式開始就吸引到過百名玩家排隊等住第一時間買Game。
搵唐寧撐場
筆者就問過幾位玩家為何喺烈日30度下都照樣嚟排隊，其答案都大同小異，除咗對《FORZA》感興趣外，原來當日首100名買家，就可獲得價值$1,000嘅專用軚盤，加埋可得到現場嘉賓唐寧親筆簽名留念，計過度過真係物超所值。請得唐寧來當然唔會簽名咁簡單，佢自認自細玩賽車Game玩大，更即場同專業車手較量一場，可能專家即是專家，又可能未太習慣，落場嘅車手都將唐寧放甩幾條街，慘敗而回，之後再鬥一場，今次就由現場玩家出賽，果然有料到，贏番一場。
物理運算添真實感
XBOX之前嘅《PRG2》，最大賣點係有條灣仔會展賽道，不過去到《FORZA》就變得無影無蹤，取而代之換上多款賽道同賽車場；一開始只玩到頭3個，需要玩家勝出賽事先能夠「開鎖」，部份賽道由於依真實場地設計，好似「TsukubaCircuit」賽道，有玩過《GT4》都會覺得熟口熟面！賽道亦非常細緻，當賽車撞上防護欄，還會見到欄上有車身剝落嘅焗漆，而賽車本身亦會將碰撞損傷或者損耗等情況反映於車身上，想用「碰碰車」呢招勝出，簡直妄想！其他影響賽車表現嘅運算，如極速甩尾、鏟上沙地草地等，均會有顯著變化，連輪胎都會出現耗損，令玩家須考慮更多嘅變數！
自貼愛駒車花
對愛車之人，《FORZA》更會多個吸引之處；替愛駒進行調校，如避震硬度、重心分配等，甚至安裝配件，如增加擾流尾翼等，型仔得嚟亦有實際用途。實地玩過後，發覺調校幾考功夫，一味調高馬力雖可谷高賽車極速，不過就好易失控，對多彎賽道操控尤其困難。車身塗裝及貼車花亦係一大賣點，除揀顏色外，重可選擇車身貼紙周圍貼，讓玩家出動獨一無二嘅靚車出賽，玩起上嚟零舍醒神！
現場花絮
