外圍股市升，但香港噚日只係升得一陣，收市重要倒跌，全日成交奀豬豬，真係悶到人想瞓覺。經紀黃話，唔止小初1個人悶，其實好多炒家都冇搞作，走晒去抽新股，其中招緊股嘅包浩斯（新股編號483），同埋下周招股的中國特鋼，據講都獲得芬佬垂青。
包浩斯係零售業，賣嘅係後生仔女服裝，呢期五一黃金周，斷估零售股會係焦點，加上先排上市的I.T（999），抽到新股的散戶不但首日沽貨有唔錯收穫，而且家陣都守住2元樓上，相當有交代，所以包浩斯有人鍾意唔出奇，但最弊隻股集資額細，公開招股部份重更細，真係抽中都唔慌分得多。
講起零售股，早排經紀黃品題的金利來（533），噚日又升8.83％，收1.11元，又創52周新高。
經紀黃話，相對其他先前熱炒的零售股，PE炒到廿倍樓上，金利來現價唔算貴，相對仍落後，家陣股價升番多少並唔算太過份。
慕容小初