NBA火箭隊教練雲根迪因為日前公開指摘球證執法上故意針對姚明，噚日俾聯盟罰款十萬美金（約港幣七十八萬港元），呢次罰款更加係NBA史上對教練開出最重嘅罰款單；NBA總監史坦更加話到明呢次事件可能重有手尾跟，唔排除繼續調查，雲根迪可能會終身停賽㖭。
姚明獲悉判罰之後即刻表示會負責教練一半嘅罰款，理由係雲根迪今次被罰完全因為佢喎。其實教練經常都會為咗維護自己嘅球員同球證爭吵或者批評球證，呢啲係平常事，姚明根本唔需要負乜責任；啱啱喺國內當選「勞模」嘅姚明咁做可見佢好識做人，為人夠晒圓滑，肯定佢嘅前途同錢途都無可限量。
講番轉頭，雲根迪被重罰最主要係佢話小馬班主古賓背後搞鬼，令球證受壓要向姚明嚴厲執法。睇番姚明首四場波經常四犯同五犯，如果唔係太離譜睇怕雲根迪都唔會咁放肆，不過睇噚日火箭輸咗嗰場波，姚明咪一樣被吹四犯，今次雲根迪真係偷雞唔到蝕渣米囉！
紐記「洗底」一舉兩得
紐卡素中場保耶早前同隊友戴亞喺比賽中「講手」，加上佢個「底」唔好，球會已準備將佢掛牌二百萬鎊（約三千萬港元）求售。如果成事，紐卡素就真係大贏家囉！當日保耶免轉會費由韋斯咸加盟後，除咗成日因紀律問題俾球會罰錢，𠵱家轉下手又隨時多筆轉會費進帳㖭！
普茅當擁躉儍㗎
英冠聯球隊普利茅夫最近呼籲球迷集資三十五萬鎊（約五百二十五萬港元），幫佢哋出錢將今季從波圖借入嘅匈牙利前鋒保沙基買斷！要知道保沙基今季為球隊上陣十三場只入一球，重要係嚟自現今足球水平一般嘅匈牙利；畀着我求大俠係佢哋球迷，真係睬佢都儍。
李爾曉士重新做人
因揸車撞死人而被判入獄六年嘅前西布朗前鋒李爾曉士，喺獄中信咗穆斯林教，聽講佢咁做係想有啲精神寄託，等日子好過啲。很多宗教都係導人向善，我求大俠希望𠵱家有咗宗教信仰嘅李爾曉士，第日出返嚟，唔好再酗酒、吸毒同揸快車，可以做番個正常人就好嘞。
唔係嘛愉園咁慘
愉園周日響足總盃打足百二分鐘至險勝流浪，前晚在主席盃又要出主力對南華；探子回報，愉園主力搏到傷殘，范俊業同梁卓長兩個門將都要串演中場；諗深層其實好可悲，預備組係畀年輕球員踢，但各隊都唔多願搞青年軍，預備組聯賽同主席盃已變全甲組對碰，咁落去真唔掂。