孫燕姿同佢個做銀行嘅新加坡男友丹尼斯去年戀情曝光後，燕姿因工作成日要飛嚟飛去，所以同男友聚少離多。丹尼斯呢個禮拜咁啱去咗台灣開會，乘機探吓女友，以解相思之苦。佢哋重拍拖行書店，好鬼sweet。
嗰晚燕姿同男友丹尼斯着住便服、踢住拖鞋拍拖行街，之後又去咗敦南誠品書店。雖然佢哋一入書店就俾人認出，不過呢對「踢拖愛侶」一於好少理，繼續睇書。燕姿行到邊，丹尼斯就跟到去邊，燕姿又不時用英文問吓丹尼斯對本書有乜意見。
丹尼斯陪完女友行書店之後，又做埋柴可夫載燕姿返屋企，丹尼斯重順便去附近便利店買飲品同零食畀女友，真係好體貼。
名模蔣怡（CoCo）早前為雜誌《Maxim》影封面同做訪問。原來CoCo好鍾意去旅行，尤其對非州情有獨鍾㖭！CoCo認為非洲係過二人世界嘅好地方，佢話：「我覺得嗰度好浪漫、好刺激，兩個人去到野生動物公園，每日會見到獅子同老虎，會好興奮，話題都會多啲。」CoCo重話如果要移民嘅話，非洲係佢嘅首選！
近排受緋聞困擾嘅朱孝天，最近嚟咗香港拍廣告，前晚佢離開酒店去土瓜灣一幢大廈，唔知搞乜，馮仁昭見佢個樣殘晒兼木無表情，又十問九唔應，好冇心機咁。有街坊見到就估佢上樓睇醫生，但亦有口痕友話：「樓上冇醫生㗎喎，女仔就有好多！」
薛凱琪（Fiona）噚日到商台接受訪問，佢話前日喬裝同家人一齊去睇《早熟》，不過最後都俾人認出。Fiona嚟緊會接拍馬偉豪嘅新片，之前楊千嬅拍完馬偉豪嘅戲就成為票房靈丹，Fiona就話：「咁咪開心囉，好似千嬅咁好，不過我始終重係新人。」
