美國加息在即，市場不但要睇香港銀行點反應，亦要睇埋樓市點反應，港股噚日升至13994就回頭，連萬四點都摸唔到，收市報13894，跌14點。
市場一般都預咗美國加息0.25厘，香港銀行就吹風話未必會即刻跟住加，因為市場游資仍充裕，但議息之後若然聯儲局有出乎意料之外的言論，美股難免出現大波動。
中移動（941）近期走勢明顯偏強，由上月中的25.10元升至昨日收市的27.45元，唔經唔覺已上升近一成。黑客話，近期買盤主要來自衍生工具發行商，據講有大戶看好中移動將獲發3G牌，兼受惠於國內整合電訊市場。
中信泰富（267）企硬東隧加價決定，股價亦企硬在23.45元，冇起跌。但噚日紅隧塞車情況冇預期咁嚴重，而東隧車流量則明顯減少，流量減少會否令東隧收益因加得減，暫時未知。若政客及市民繼續向政府施壓要解決紅隧塞車問題，則榮總贏面仍相當高，因最終解決方案，不外乎紅隧加價、政府高價購回東隧、現金補貼東隧或延長其專營權。若大家唔想向東隧屈服，最好就係忍一忍，唔用私家車轉用公共交通工具過海，大幅減低東隧車流量，令其加價決定變成得不償失。過咗專營期後，成條隧道就屬於政府，希望大家現在咪迫政府做出錯誤決定。
黃金周後零售股表現一般，慕詩（130）跌0.82%、恒豐金（870）跌2.6%、六福（590）跌1.88%。市傳國內旅客會因為迪土尼9月開幕而押後來港，呢個黃金周來港人數不多。但事實上，上周六至本周一，內地來港旅客較往年上升7.7%至17.57萬人，情況唔算差。
阿虎