大長今五一大結局，旋風威力驚人，搞到當晚街上行人大減，唔少行業生意受到影響，而代理行業都係受害者之一。
祥益盤嘉茵話，公司屯門與天水圍，嗰日成交夾埋只得二十宗，翌日先升番到正常嘅二十七宗。佢都估唔到，大長今威力咁大。
佢話，當日一對由黃大仙入嚟，睇邁亞美海灣嘅夫婦，近七點，雖然男方重想睇樓，點知女方已經急住要走。公司唔少同事，八點零鐘就有時間可以準備第日嘅工作，有啲十點零鐘已經返到屋企㖭。佢自己十點零就同人食緊飯。平時同事一般要成十一點至收得工。
盤嘉茵補充，好多業主唔想喺呢個時段畀買家睇樓，而買家又唔想去睇樓，大家都要留喺屋企，唔想錯過大結局。
今年五一，部份代理行再度辦團，接待內地客嚟睇樓，不過，世紀21就反其道而行，安排港客北上睇樓。
董事楊靄良話，呢個「廣州珠江地產睇樓團」，一行四十幾人，坐巴士前往廣州，參觀天河半山雍景苑、海珠羅馬家園及從化東方夏灣拿。
半山雍景苑呎價六百五、羅馬家園五百八、東方夏灣拿四百八至五百。佢哋收到查詢及攞料，短期可望成交。
嚟緊周日母親節，熟口熟面商場例牌有活動，今次有個冷門加入──香港仔中心商場。
本月八日前，消費滿五百，可以有人幫你執屋。消費須包括三張不同商舖發票，其中兩張要食肆發票，就可以喺周六日換一張「兩小時環保家務助理服務」換領券，名額三百個，可以喺三個月內享用。
服務由婦女綠色生活合作社提供，佢哋自備環保清潔用品上門。不過，服務範圍唔包離島，部份新界地區，就要協商收番啲交通費。
講開商場，新地觀塘apm，五一直播大長今外，新地會當日包咗場內嘅戲院，招待近千名會員睇戲。新地馮秀炎噚日話，個場五一人均消費逾五百，食肆生意比平日多兩成。
香港興業同系興勝創建，舊年與獨立第三者聯手，掃入九龍塘書院道四號三層高大屋，兩萬呎，本來諗住翻新收租，點知畀咗仲量行標售，五月二十五號截標，投資路向耐人尋味。
興勝創建舊年中買入時，個市未有咁癲，其後受何文田地王成交價刺激，過去半年，地價飆升，以每呎樓面地價五千幾計，個地盤淨地價都值成億，同買入價二千幾萬比，利潤隨時有兩倍以上，短炒可能好過長揸或起樓。
澳門擬藉收緊按揭成數，壓抑炒風，美記張一輝話，咁樣做難以遏止炒風，佢日前建議，要採取限制賣樓花措施，以及提高臨時印花稅率。
噚日，佢再提議當局，若要實施新措施，應同時提供首次置業貸款，首次置業者，可以較市場為低的息率，借取樓價兩成作首期，而購入嘅單位，就規定兩年內不可轉售。佢重申，將樓花轉讓印花稅，提高至同二手樓一樣，三點五巴仙，可以有效打擊炒風。
電郵地址：[email protected]