八方日前寫有關李國能老竇、前華民政務司李福逑嘅威水史，唔覺意搵到一張好寶貴嘅黑白相，攝於一九七三年，當年一班年輕嘅政務官（AO）歡送首位華人政務官徐家祥（二排右五）榮休，李福逑（二排左四）當然在坐，第一位女華人政務官陳方安生（二排右四）就坐正喺徐家祥旁邊，可謂天之驕女。
時光倒流三十二年，真係要考吓大家嘅認人能力，呢張相入面，有唔少人已退出官場，或從商，或安享晚年。當紅嘅亦有，新的特首真命天子曾蔭權已經蒲頭，佢當年重未打煲呔，坐喺前排地下，個樣斯斯文文唔多起眼。已經準備好做煲呔副手嘅許仕仁亦都係坐地，個樣瘦啲唔易認，不過件棉襖就係許老爺招牌服飾。
前排重有林中麟（右四）、陳祖澤（右三）同丁福祥（右二），第二排就有楊啟彥（左一）、余黎青萍（左五）、何鴻鑾（右三）同徐淦（右二）；第三排由右起三位女高官都唔難認，佢哋係霍羅兆貞、張綠萍同李麗娟，後排左四有位蘇澤光，至於其他人等，大家要慢慢認吓。
李麗娟曾經同八方講過，做AO第一日就知道最高可以做到港督（即係𠵱家嘅特首），當年有邊個估到呢個人會係煲呔曾呢？
壹週刊圖片
爆料熱線：2929 0000、2786 0099
報料傳真：2623 9278
報料電郵：[email protected]