民主黨立法會議員涂謹申舊年選舉期間，被揭發申領公帑，以高於市值租金租用黨產，據聞民主黨上個月通過出售嗰個位於荔枝角道、惹來連串是非嘅單位，並已喺市場求售。
民主黨喺九七年樓市高峯，以過百萬買入單位，𠵱家樓市雖然有啲起色，但重未返番到九七年咁好景，加上單位位於大角嘴舊區，樓價易跌難升，民主黨以市價求售，據聞開價低於五十萬，連埋利息同其他使費，自置黨產結果要勁蝕超過半百萬，加上政黨聲譽受損，今次真係蝕到入肉。
知情人士話，民主黨將個單位放盤，估計同有關方面調查事件已屆尾聲有關，立法會早前已「訓誡」涂謹申，廉署方面相信亦冇乜手尾，故希望速速將個單位甩手，早日了結件事。
傳真︰2623-9278
電郵︰[email protected]