701收料站:猛人入局合生看好

701收料站:猛人入局合生看好

阿爺話要抑制房地產增長過快,不但出口術,重推出多項措施,搞到呢排大陸地產股冇運行,好似首創置業(2868)、上海置業(1207)及上海復地(2337)等股價均由高位回落甚多。
不過,經紀黃睇好比較冷門的合生創展(754),佢話由於有猛人入局,而且上市以來,業績表現唔錯,若作中線投資,在芸芸大陸地產股中可看高一線。
合生創展一向冷門,但自從年初被1間歐資行睇起,話佢股價較資產淨值有極大折讓之後,股價就由唔夠3元水平,升到最高5元樓上。隻股升得咁容易,當然係因為貨源歸邊,較易舞上舞落之故,但隨着大陸地產股降溫後,合生成交明顯減少,好似上周五就完全冇成交,按盤價4.225元。
上周合生公布,委任之前曾領導粵海投資(270)完成債務重組的老總做董事。經紀黃話係好消息,要對合生另眼相看,皆因好少大型紅籌的老總肯轉投民營企業,反映合生確係有辦法。事實上,有位來頭咁勁嘅老總坐鎮,無論對公司形象或與芬佬溝通都會有好大幫助。
慕容小初