無綫劇集《學警雄心》嘅一班藝員苗僑偉、陳鍵鋒、吳卓羲、楊怡同薛凱琪等噚日喺奧海城舉行宣傳活動，重同大家分享吓拍劇感受。
薛凱琪噚日同傳過不和嘅陳鍵鋒碰頭，重安排喺同一組玩遊戲，但陳鍵鋒就句句啄住薛凱琪。薛凱琪話：「劉錦玲飾演我阿媽，不過佢似我家姐。」陳鍵鋒竟然即刻話：「夠喇，講咁多，唔係你簽唱會呀。」之後阿苗叫薛凱琪講吓拍劇感受時，佢又忸忸怩怩話：「做乜係都要人企出嚟講，好尷尬。」
薛凱琪有首新歌叫《小黑與我》，陳鍵鋒就特登將佢首歌名講錯，寸佢話：「咁你講吓小黑與狗。」薛凱琪就順勢宣傳話：「我首新歌係《男孩像我》。」點知陳鍵鋒加一句：「我知，但我哋唔會幫你首歌做宣傳。」
陳鍵鋒之後同記者講：「我哋一向都好朋友，咁我哋個場合真係宣傳《學警》，唔應該幫人宣傳新歌嘛。」至於阿苗見《學警雄心》收視唔錯，已經約定大家食飯睇大結局，如果收視再好啲會再擦一餐。
另外，對於內地有人將薛凱琪張相同熱線電話廣告一齊刊登，佢話：「個廣告重要寫住『青春鄰家少女，會令你有意想不到嘅驚喜』，我朋友重笑我係咪有秘撈。」
張文慈噚日出席喺柴灣舉行嘅活動時話自己想生仔，因為有三個相士都話啲仔女會旺佢，張文慈話：「啲仔女靚唔靚唔緊要，最緊要個老公靚。」問佢會唔會好似喻可欣咁想搵劉德華借種，佢話：「華仔咁靚仔梗係唔敢啦，要借都問李嘉誠借！」
韓國女星李英愛自演出韓劇《大長今》後紅到痹，由佢主演嘅新戲《親切的金子》經過五個月拍攝之後，終於喺上個月二十八號宣告煞科。李英愛早前就為《親》片到咗澳洲拍外景，電影預計七月喺韓國上映，到時大家可以睇吓佢點樣復仇。
梁靖琪（Toby）同郭芯其噚日齊齊出席喺九龍灣舉行嘅活動，佢哋一個啱啱喺組合女生宿舍度拆出嚟作個人發展，一個就啱啱入樂壇，所以一見面就非常好傾。由於郭芯其高過Toby成個頭，所以佢都特登彎低腰就Toby，認真唔話得。
關智斌（Kenny）將開始作個人發展，最近佢為新歌《分手不要太悲傷》拍MV，Kenny要孭住女主角喺四十七樓嘅天台走來走去，雖然稱得上係好豔福，但Kenny就驚驚哋咁話：「拍嘅時候對腳真係震過貓王呀，不過個女仔我識咗一段時間，就算拍啲親密鏡頭都唔會好尷尬。」
莫文蔚同藍奕邦噚日到商台接受訪問，藍奕邦用二十分鐘作咗首歌畀莫文蔚，令佢非常開心，莫文蔚話：「我頭先講咗細個喺意大利嘅初戀畀佢聽，估唔到佢咁快就作曲填詞搞掂晒。」對有報道指馮德倫同楊恭如擦出愛火花，莫文蔚就話：「算啦！呢單料咁流，唔使嘥氣。」
