長洲太平清醮，本來有搶包山，但因為呢隻小農社會嘅集體活動，帶有部落色彩，兼散播一種飢餓氣氛，又試過一年，成座包山冧檔，造成傷亡，前殖民地政府為協助長洲居民與國際接軌，提高小農社會文明素質，於是毅然決定將搶包山項目，列為非法！
點知「回歸」之後，香港向後退，「搶包山」又蠢蠢有復甦迹象！長洲搞咗一個「搶包山選拔賽」，教壞青少年，竟然鼓勵縱容一啲攀慣山石嘅運動員，走去示範搶包山！
講到搶包山，又使乜練習吖？中國小農社會，衣食住行，查實全部都有搶包山嘅精神內涵！
嗱，例如前年七月十四盂蘭節，深水埗某米舖老細為酬謝神恩，在舖外大撒硬幣現金，有一蚊、五蚊、十蚊，結果就吸引咗成千上百攞開綜援嘅公公婆婆走埋嚟狂搶喎！老人家都咁好精力？梗係喇，有錢執吖嘛！
重有買領匯，揸住啲優惠券換領贈品，或者年初一黃大仙裝頭炷香，邊一鑊唔係搶包山吖？
鑑於小農社會充滿呢隻飢餓DNA，成為搶包山嘅最大原動力，鬼佬遊客一向以仰慕東方文化嘅眼光爭住影相留念，長洲恢復搶包山，對於提高特區作為國際大都會，追倫敦，趕紐約，曼哈吞Plus，查實，都係一件好事嚟！
至於搶包山示範，呢，睇吓八年來啲特區精英咪得囉！當年江太祖欽點董建華，嘩，當堂如蟻附羶咁，爭住去搶阿董嘅包山，「董包山」不勝負荷，死嘞，冧嘞！搶佢包山，只有辱，沒有榮，董包山啲包跌晒一地，唔怕，現時又有「曾煲呔」第二座包山搭起嘞，賭王率先吹雞，主持搶包山開幕儀式，初初啲愛國同胞你望我，我望你，嫌座包山有陣「餘孽」味，蔡素玉懶潔癖，阿支阿佐，但壽爺對眼一厲，呢嗱，又搶過咯喎，搶包山，使乜選拔？香港唔係高科技港，唔係中藥港，根本就係一個「包山港」喇！
傳真︰2623-9278
電郵︰[email protected]