上周五晚美股彈升，收復周四急跌失地，昨晚美股如果冇乜特別，港股都怕會再好少少。
滙控C輪4766：滙控（005）股東依時依候收息，3月中所除末期息2.11元，應該明日寄到畀股東。今日滙控又宣布05年第1中期，估計派1.07元，按照往年習慣，應該會喺5月18日左右除息。
炒滙控C輪，要睇住滙控除息日期。買滙控除息後冇耐夠鐘嘅C輪，會比較蝕章。遠期C輪，對除息反應冇咁敏感，值得揀嘅有4766，年底到期，輪價57仙，溢價2.2%，槓桿率21.9倍（有效13.2倍），引伸波幅11.3%。壽命相若嘅3976，吸引力相若，交投則有不如。
恒指C輪3795：大市反覆向上，偶有回吐，吼住買恒指C輪短炒，咪大貪，有多少利錢即套現離場，對象係3795，7月尾到期，輪價15.2仙，溢價1%，槓桿率21.3倍（有效14.4倍），引伸波幅15.2%。大市若升得急啲，則咪追落去。
恒指P輪3605：恒指輪交投熾熱，唔少人一日炒幾轉，冇印花稅，炒費輕，偶見恒指升得急，博短時間（可能係1個鐘頭）回軟。炒恒指P輪，可以向3605埋手，炒1日半日或者1個鐘頭。
章盛