五一黃金周未過，趙飛雲已經唔見咗幾両金，皆因有大陸老友來香港度假，想話體驗香港生活，結果周六遊澳門，周日入馬場，而且兩晚賭波賭到天光達旦。噚晚問老友今日上唔上股票行，老友耍手兼擰頭話，香港人一星期炒5日股票，跑兩次馬，幾乎有7日波賭，就算有咁多錢賭，都應該冇咁好精神應付，點解重話想開賭場，唔通真係想全民皆變賭徒？趙飛雲無言以對，擔心是否已變病態賭徒。
閒話講過，回歸正題。上周五美股初段承接周四跌勢，曾低見10048，但好友借油價回落又大幅挾高，結果杜指大升122點，收10192。杜指反覆得嚟又好有規律，自前周三起都是一日大升一日大跌的單跳走勢，已連開10日。香港投資者睇見美股咁波動，散戶一般睇多過做，但大戶則似看好，恒指上周逼近萬四心理關口，收13908。
港股4月上升392點，升幅2.9%。杜指則跌310點，跌幅2.9%，港美股市上月走勢背馳，5月又如何呢？由月線圖看，美股其實頗差，5月下試9700的機會相當大，甚至有機會下試9500，短期關鍵主要看能否盡快重上10360之上企穩。
恒指相對杜指好得多，現時是向上試頂的走勢，但14100-14300阻力區不易破，假如升得破，首站見14550。另方面，假如美股確認展開跌浪，相信港股難繼續獨善其身，恒指5月波動區可能逾千點，由14300-13000。這是趙飛雲入市態度審慎的原因。
美股上周五雖然上升，但港股今日升跌，還看周一晚美股表現。恒指上周五沽空高達11億元，似乎是大撼大的格局，稍後通常有兩種情況出現，一是好友勢強，空軍被迫補倉，沽空大的股票動力大增，升到你唔信，並帶動大市上升。另方面，則是空軍得勢，沽空大的股票跌勢突轉急，帶動大市下滑。
趙飛雲