咪以為車路士球員個個淨係掛住歐冠盃，好似隊長泰利就誓神劈願話最後三場聯賽自己一定上陣，理由係為「美化家居」喎。
此話何解？泰利話佢會將成季每一場着過嘅波衫、隊長臂章裱起佢，然後掛上屋企一幅牆上作為紀念。佢話：「我由今季踢完第四、五場波左右就有呢個念頭，我知道咁做需要好大幅牆，或者我要叠起啲衫至得。」泰利係今季車路士其中一個踢足全季嘅球員，另外兩個係施亞同埋林柏特。
其實點止泰利一個重會掛住聯賽？班職球員肯定贏就贏到盡，想打破埋二千年由曼聯造出嘅九十一得分紀錄（以二十隊計）。家陣「車仔」有八十八分，未來三場攞四分就掂。講時講，博彩公司未因「車仔」已封王而無嘢玩，開咗佢哋最後贏第二位球隊幾多分嘅賠率，目前最熱係贏八至十一分，賠率係二點三七五倍。
老費借球迷口迫續約
曼聯星期日晚就打番場翻身仗，作客大炒查爾頓四粒，不過唔係個個紅魔都咁開心，事關要求由周薪七萬鎊大幅提高至十二萬鎊先肯續約嘅李奧費迪南就成場俾紅魔fans狂噓，教練費格遜事後重「潤一潤」李奧㖭：「球會已經畀佢好好待遇（出到球會最高嘅九萬鎊），又難怪球迷咁勞氣。」唔通老費想「借刀殺人」，迫李奧早啲續約乎？
朗尼要自我反省
曼聯前鋒朗尼負面新聞不絕，又打女友又召妓，英格蘭學校足球聯會剛剛宣布，取消埋朗尼仔擔任青少年足球聯賽代言人身份，原因係朗尼仔已經唔係青少年嘅典範，所以搵另一個青年球星代替；其實好多早成名嘅球星，就因為沉迷星色犬馬而自毀前程，希望十九歲仔嘅朗尼引以為鑑，踢好波之餘，場外場內都係唔好再搞事嘞。
博盡出局亦猶榮
NBA季後賽打咗個禮拜多，灰熊同網隊都捧蛋提前放暑假；有啲口痕友話網隊同熱火實力根本冇得揮，早知唔使咁辛苦爭個季後賽席位，叠埋心水攞個好啲嘅選秀機會率，同畀騎士勒邦同木狼加尼特打重好過；不過所有球隊打成八十幾場常規賽，目的就係入季後賽，冇理由有機會都唔博㗎，而且亦點都唔會諗到自己捧蛋出局，咪馬後炮好喎！