街知巷聞的霸王鴨，在1945年由「蓮香樓」行政總廚顧問龍甜師傅創製，當年每隻賣超貴價$100，60年後的今天，同一道菜只賣$120，你我睇少場戲已經吃得起。手執鴨髀大啖咬的同時，不妨與90多歲的龍師傅細數當年，聽古仔吃鴨髀，你會發覺特別美味。
記者：陳心 攝影：伍慶泉
79年老店製餅起家
最早的「蓮香樓」在廣州開業，前身是提供中式糕餅為主的「連香餅家」，話說某食客吃過蓮香出品的月餅，大讚月餅餡內的蓮蓉又香又滑，水準非凡，一時興起便入舖提下「蓮香樓」三字，寓意蓮蓉香氣四溢，一樓蓮香。1926年，香港「蓮香樓」正式開業，當時以餅家及提供點心的早午茶樓生意為主，沒有夜市，因為20年代的香港，做夜市的只有「酒家」，「酒家」只做晚飯及酒席生意。
搭枱搭出友情
屈指一算「蓮香樓」已有79年歷史，至今仍保留古老酒樓風貌，夥計用大茶壺沖茶，全場清一色大圓枱，旺市時食客難免要搭枱，鎮店之寶有行政總廚顧問龍甜師傅，年屆九十多歲的他懷緬道：「中式茶樓嘛，坐圓枱至好嘛，熟客日日嚟，日日搭枱，見得多咪熟絡囉，幾十年友情咪搭吓搭吓搭出嚟囉。」他創製的霸王鴨更賣到街知巷聞，1945年已經每隻賣高價$100，現在卻成為了平民大眾也可以吃得到的傳統美食，不少名人明星慕名光顧，兩個月前水禾田還在貴賓提名板上簽字留名，足證此經典菜如何受歡迎。
霸王鴨貴在複雜手工
霸王鴨為何可以賣超貴價每隻$100？話說1945年的戰後香港社會經濟仍未發達，港人普遍生活艱難，只有大時大節才捨得花錢上酒樓吃一頓豐富的。有見及此，龍師傅便想用多種配料及複雜製法炮製一味富貴菜式：「配料好多，製法又複雜，鴨身塞滿配料，所以咪賣得貴囉！不過上到枱又大大隻咁，人客食落咪覺得物超所值囉！𠵱家都重係賣$120，維到本咪唔加價囉！」霸王鴨將2斤重原隻鴨拆骨，然後釀入蓮子、薏米、鴨肉粒、冬菇粒、白果、鹹蛋黃各4両，再上老抽炸至金黃，然後再將整隻鴨用靚陳皮及上湯浸2小時，直至鴨身腍透方大功告成，上桌一隻霸王鴨還差不多有3斤重，確實抵食。
家鄉煎藕餅 $38
把瘦肉、蝦米、冬菇、蓮藕、蝦膠打爛撈勻成圓餅形，然後煎至金黃色便成。看似簡單，但極考師傅撈勻各種材料時的力度，拿揑得準，藕餅才會爽口。
炸釀土鯪魚 $48
此菜是廣東人傳統美食，雖然其他酒家也吃得到，但要做得好味，卻非常考究材料和師傅的廚藝，可選擇加上芡汁或乾身上桌。
炒芙蓉蟹 $48
正宗古老粵菜，別家酒家很難吃得到，也是龍師傅自創的粵菜之一，選用新鮮蟹肉，混入芽菜、紅、青椒絲及蛋漿煎成金黃餅塊，味道香口。
炒桂花肚 $38
選用貴價魚肚浸透滾熟，然後切碎，用上湯餵至入味，再配合紅蘿蔔絲、芽菜，下蛋漿快速炒熟，啖之方覺陣陣魚鮮味。
蓮香樓（25444556）
地址：上環威靈頓街162號
營業時間：6:00am至11:00pm
坐位：200個