東區海底隧道日前正式加價，由原本的十五元單程過海收費激增至二十五元，對此劉德華昨日表示會暫停用東隧，寧願提早出門，而任達華更直斥此舉為政府陰謀，並嗟歎市民及司機一向都是任人魚肉。
東區海底隧道單程收費日前激增至二十五元，對於一眾經常要在港九兩邊走的藝人來說，負擔大增。劉德華（華仔）昨日到港台宣傳新歌《我得你》，提到東隧加價，他說：「東隧加價係十個唔得！𠵱家暫時唔用東隧，寧願早啲出門口。唔得係因為東隧加價嘅道理、態度都唔正確。」
而任達華前晚在尖沙嘴出席林雅詩的喜宴時則說：「成件事係政府陰謀論，東隧加價之後，紅隧西隧實話加啦，個個加價咪迫啲人坐地鐵囉。政府開始喺地鐵上蓋起物業救市，補貼呢幾年支出，地鐵物業升值完全係政府陰謀。遲多兩年，三條隧道加到六十蚊呀，呢啲係不平等條約，我唔會抵制東隧，減少用囉，我噚日揸車都係用紅隧，全港市民同司機都係任人魚肉㗎啦！自己要多啲出埠搵錢，要嚟返香港畀隧道錢呀！」
家住北角半山的佘詩曼，經常要駕車經東隧到將軍澳電視廣播城開工，對此阿佘昨日透過電話說：「皮費開支梗係會大咗啦，我差唔多每日都要過海開工，東隧真係唔應該加價。」同樣居於北角半山的梁漢文昨日亦透過助手說：「我不嬲都係行舊隧多，東隧加價咪更加少行囉。」
此外，前晚華仔到紅館欣賞許冠文的棟篤笑，只見他與曾蔭權言談甚歡，華仔說：「係咪認錯我係林建岳？林生坐我隔籬，而我同曾生就隔一個位。基本上我同佢見面打個招呼，開騷前佢問我點解可以keep得咁fit，佢話自己日日游水都咁肥。」
採訪、攝影：魯萍、王連連、朱倬誼
