尖沙嘴海港城商場，噚日搞咗個預祝母親節活動，由唔同國籍嘅小朋友，用手工紙做蛋糕送畀媽咪，商場重請嚟《殘酷一叮》小台主莫凱謙做嘉賓。估唔到佢人仔細細，得嗰七歲，整出嚟嘅「芒果蛋糕」都似模似樣，喺佢隔鄰嘅媽咪肯定係最開心嘅一個。
唔講唔知，原來莫凱謙同海港城好有淵源，喺《殘酷一叮》比賽前，大約舊年中，佢參加過海港城搞嘅歌唱比賽，重攞咗冠軍。而今次請小台主嚟海港城嘅，就係九倉呢個場嘅揸弗人之一凌緣庭，佢係九一年華裔小姐冠軍，呢次可以講係冠軍對冠軍。
電視嘅威力果然唔可以睇小，港產節目《殘酷一叮》成為街頭巷尾談論題材，提起莫凱謙呢個名，八方唔少同事都即時認得出佢。
傳真︰2623-9278
電郵︰[email protected]